KHizan se manus ho chuke hain nahin KHabar kuchh bahaar kya hai

ḳhizāñ se mānūs ho chuke haiñ nahīñ ḳhabar kuchh bahār kyā hai

taḌap kī lazzat hai jin ko hāsil nazar meñ un kī qarār kyā hai

bachegā kab tak ġharīb insāñ havādis-e-gardish-e-zamāñ se

havā ke jhoñkoñ meñ jal sakegā charāġh ye e'tibār kyā hai

qarīb ho kar bhī duur haiñ jaise ek dariyā ke do kināre

yūñhī gulistāñ meñ rah ke bhī ham nahīñ haiñ vāqif bahār kyā hai

chaman ke ho kar jo jī rahe haiñ ḳhizāñ hai rashk-e-bahār un kī

parastish-e-gulsitāñ hī Thahrī to farq-e-ġhuncha-o-ḳhār kyā hai

nashāt-e-vasl-o-sharāb-e-dīdār par jo kam-zarf mutma.in haiñ

unheñ koī kis tarah batā.e ta.ayyush-e-intizār kyā hai

ḳhudā-rā 'altāf' mujh se ahbāb merī tanhā.iyāñ na chhīneñ

ġhamoñ ke hote hue kisī ko zarūrat-e-ġham-gusār kyā hai

KHizan se manus ho chuke hain nahin KHabar kuchh bahaar kya hai

taDap ki lazzat hai jin ko hasil nazar mein un ki qarar kya hai

bachega kab tak gharib insan hawadis-e-gardish-e-zaman se

hawa ke jhonkon mein jal sakega charagh ye e'tibar kya hai

qarib ho kar bhi dur hain jaise ek dariya ke do kinare

yunhi gulistan mein rah ke bhi hum nahin hain waqif bahaar kya hai

chaman ke ho kar jo ji rahe hain KHizan hai rashk-e-bahaar un ki

parastish-e-gulsitan hi Thahri to farq-e-ghuncha-o-KHar kya hai

nashat-e-wasl-o-sharab-e-didar par jo kam-zarf mutmain hain

unhen koi kis tarah batae tayyush-e-intizar kya hai

KHuda-ra 'altaf' mujh se ahbab meri tanhaiyan na chhinen

ghamon ke hote hue kisi ko zarurat-e-gham-gusar kya hai