KHizr se kab hai chhupa kuchh meri manzil ke siwa

ḳhizr se kab hai chhupā kuchh mirī manzil ke sivā

jis se vāqif nahīñ koī bhī mire dil ke sivā

ham qalandar haiñ jahāñ chāheñge jā baiTheñge

aur bhī to haiñ Thikāne tirī mahfil ke sivā

jaan denā hai to phir minnat-e-qātil hī kyoñ

aur bhī to haiñ vasā.il kaf-e-qātil ke sivā

kaun hai nāqa-nashīñ kaun samajh paa.e ise

jab nazar aa.e na kuchh parda-e-mahmil ke sivā

shahr ke dūsre ruḳh ko bhī farāmosh na kar

jhoñpaḌe bhī haiñ falak-bos manāzil ke sivā

zor-e-bāzū ko zarā us ke bhī dekheñ kyā harj

band rāheñ haiñ jo sab kūcha-e-qātil ke sivā

hai zarūrī ki ho tā.īd-e-ḳhudāvandī bhī

kaam banñe ke liye apne vasā.il ke sivā

chup na hogā hai 'valī' vaqt kā apne suqrāt

kuchh ilaaj us kā nahīñ zahr-e-halāhil ke sivā

KHizr se kab hai chhupa kuchh meri manzil ke siwa

jis se waqif nahin koi bhi mere dil ke siwa

hum qalandar hain jahan chahenge ja baiThenge

aur bhi to hain Thikane teri mahfil ke siwa

jaan dena hai to phir minnat-e-qatil hi kyon

aur bhi to hain wasail kaf-e-qatil ke siwa

kaun hai naqa-nashin kaun samajh pae ise

jab nazar aae na kuchh parda-e-mahmil ke siwa

shahr ke dusre ruKH ko bhi faramosh na kar

jhonpaDe bhi hain falak-bos manazil ke siwa

zor-e-bazu ko zara us ke bhi dekhen kya harj

band rahen hain jo sab kucha-e-qatil ke siwa

hai zaruri ki ho taid-e-KHudawandi bhi

kaam banne ke liye apne wasail ke siwa

chup na hoga hai 'wali' waqt ka apne suqraat

kuchh ilaj us ka nahin zahr-e-halahil ke siwa