kho dene ka dil bharne ka thak jaane ka KHauf

kho dene kā dil bharne kā thak jaane kā ḳhauf

ek tire hone se chakkhā kaisā kaisā ḳhauf

tum the lekin do hissoñ meñ baTe hue the tum

aañkh khulī to bistar kī har silvaT meñ thā ḳhauf

ham donoñ ke sāmne bahtā vaqt ā.īna thā

mujh ko us ne ḳhvāb dikhā.e tujhe dikhāyā ḳhauf

is raste par mujh se pahle koī nahīñ aayā

ek anokhī sarshārī hai ik an-jānā ḳhauf

isī liye maiñ sambhal sambhal kar qadam uThātī huuñ

itnī bulandī se rahtā hai gir jaane kā ḳhauf

in logoñ ko kyā lagtā hai Dar jā.ūñgī maiñ

ye ḳhud mujh se Dare hue haiñ in se kaisā ḳhauf

vaqt kī āñdhī le uḌtī hai kaise kaise log

soch ke dil ko ḳhauf aatā hai achchhā-ḳhāsā ḳhauf

ab khiḌkī par jamī huī har aañkh se jhāñktā hai

is bārish meñ āḳhirī pattā jhaḌ jaane kā ḳhauf

kho dene ka dil bharne ka thak jaane ka KHauf

ek tere hone se chakkha kaisa kaisa KHauf

tum the lekin do hisson mein baTe hue the tum

aankh khuli to bistar ki har silwaT mein tha KHauf

hum donon ke samne bahta waqt aaina tha

mujh ko us ne KHwab dikhae tujhe dikhaya KHauf

is raste par mujh se pahle koi nahin aaya

ek anokhi sarshaari hai ek an-jaana KHauf

isi liye main sambhal sambhal kar qadam uThati hun

itni bulandi se rahta hai gir jaane ka KHauf

in logon ko kya lagta hai Dar jaungi main

ye KHud mujh se Dare hue hain in se kaisa KHauf

waqt ki aandhi le uDti hai kaise kaise log

soch ke dil ko KHauf aata hai achchha-KHasa KHauf

ab khiDki par jami hui har aankh se jhankta hai

is barish mein aaKHiri patta jhaD jaane ka KHauf