kho gae ho tum jab se waqt ki KHalaon mein

kho ga.e ho tum jab se vaqt kī ḳhalāoñ meñ

māñgtī huuñ maiñ tum ko rāt-din du'āoñ meñ

mujh ko thī ye ḳhush-fahmī phir bahār aa.egī

raunaqeñ kahāñ ātīñ dil ke in ḳhizāoñ meñ

dil dhaḌakne lagtā hai sun ke halkī aahaT bhī

tere pyaar kī dastak jo huī havāoñ meñ

bhūlne kī koshish bhī kāmyāb kyā hotī

'aks terā dikhtā hai mujh ko sab dishāoñ meñ

saath terā pā.ūñ gar khil uThegā phir jīvan

intizār kā 'ālam hai abhī fazāoñ meñ

phir se shām-e-tanhā.ī yaad terī laa.ī hai

phir se kho gayā hai dil maazī kī guphāoñ meñ

kyā gila karūñ 'monā' terī bevafā.ī kā

jab vafā nahīñ shāmil husn kī adāoñ meñ

kho gae ho tum jab se waqt ki KHalaon mein

mangti hun main tum ko raat-din du'aon mein

mujh ko thi ye KHush-fahmi phir bahaar aaegi

raunaqen kahan aatin dil ke in KHizaon mein

dil dhaDakne lagta hai sun ke halki aahaT bhi

tere pyar ki dastak jo hui hawaon mein

bhulne ki koshish bhi kaamyab kya hoti

'aks tera dikhta hai mujh ko sab dishaon mein

sath tera paun gar khil uThega phir jiwan

intizar ka 'alam hai abhi fazaon mein

phir se sham-e-tanhai yaad teri lai hai

phir se kho gaya hai dil mazi ki guphaon mein

kya gila karun 'mona' teri bewafai ka

jab wafa nahin shamil husn ki adaon mein