khod kar buniyaad ke patthar liye phirte rahe

khod kar buniyād ke patthar liye phirte rahe

apne kāñdhoñ par ham apnā ghar liye phirte rahe

tishnagī kā almiya kis se bayāñ karte vahāñ

ham samundar meñ tahī sāġhar liye phirte rahe

aaj ke bāzār meñ sang-o-ḳhazaf kī maañg hai

la.al-o-gauhar laakh saudāgar liye phirte rahe

kyā huī sub.h-e-banaras kyā huī shām-e-avadh

ham faqat āñkhoñ meñ vo manzar liye phirte rahe

aaj tak duniyā meñ ham auroñ ke saa.e ke liye

apne sar par dhuup kī chādar liye phirte rahe

kaun detā hai shahīdān-e-vafā kā ḳhūñ-bahā

apne hāthoñ par ham apnā sar liye phirte rahe

kaam koī bhī na aaya jab paḌā vaqt-e-ḳharāb

lab pe sab alfāz ke daftar liye phirte rahe

pyaar kā paayā hai is aalam meñ kyā pyārā javāb

phuul ham hāthoñ meñ vo patthar liye phirte rahe

kheltī thī muskurāhaT jin ke hoñToñ par 'zuhūr'

āstīnoñ meñ vahī ḳhanjar liye phirte rahe

khod kar buniyaad ke patthar liye phirte rahe

apne kandhon par hum apna ghar liye phirte rahe

tishnagi ka almiya kis se bayan karte wahan

hum samundar mein tahi saghar liye phirte rahe

aaj ke bazar mein sang-o-KHazaf ki mang hai

lal-o-gauhar lakh saudagar liye phirte rahe

kya hui subh-e-banaras kya hui sham-e-awadh

hum faqat aankhon mein wo manzar liye phirte rahe

aaj tak duniya mein hum auron ke sae ke liye

apne sar par dhup ki chadar liye phirte rahe

kaun deta hai shahidan-e-wafa ka KHun-baha

apne hathon par hum apna sar liye phirte rahe

kaam koi bhi na aaya jab paDa waqt-e-KHarab

lab pe sab alfaz ke daftar liye phirte rahe

pyar ka paya hai is aalam mein kya pyara jawab

phul hum hathon mein wo patthar liye phirte rahe

khelti thi muskurahaT jin ke honTon par 'zuhur'

aastinon mein wahi KHanjar liye phirte rahe