خود آگہی کے لیے بحر‌ بیکراں میں اتر

خود آگہی کے لیے بحر‌ بیکراں میں اتر

شناوری کا ہنر ہے تو جسم و جاں میں اتر

ہر ایک بات مجھے بے یقیں سی لگتی ہے

یقین بن کے مری ذات بے گماں میں اتر

میں دھوپ دھوپ گھنی پیاس پی چکا ہوں بہت

کبھی تو ابر رواں دشت بے کراں میں اتر

ہر ایک لمحہ گریزاں سا لگ رہا ہے مجھے

کبھی تو شعلۂ خنجر غبار جاں میں اتر

نکل کے یاس کی ان سرد سرد لہروں سے

اے زندگی تو ہر اک شعلۂ جواں میں اتر

چمک اٹھیں گے اندھیروں میں انگنت سورج

تو برق بن کے مرے قلب ناتواں میں اتر

تجھے بھی کرب کے دریا میں میں ڈبو دوں گا

جو ہو سکے تو مری چشم خوں فشاں میں اتر

ہر ایک لمحہ ہے تیغ ستم تو کیا غم ہے

دراز دستی قاتل کے امتحاں میں اتر

فقیہ شہر سے قطع نظر کبھی تو نظرؔ

تو میرے اشک کی بے حرف داستاں میں اتر