KHud-agahi ke liye bahr-e-bekaran mein utar

ḳhud-āgahī ke liye bahr-e-bekarāñ meñ utar

shanāvarī kā hunar hai to jism-o-jāñ meñ utar

har ek baat mujhe be-yaqīñ sī lagtī hai

yaqīn ban ke mirī zāt-e-be-gumāñ meñ utar

maiñ dhuup dhuup ghanī pyaas pī chukā huuñ bahut

kabhī to abr-e-ravāñ dasht-e-be-karāñ meñ utar

har ek lamha gurezāñ sā lag rahā hai mujhe

kabhī to sho.ala-e-ḳhanjar ġhubār-e-jāñ meñ utar

nikal ke yaas kī in sard sard lahroñ se

ai zindagī tū har ik sho.ala-e-javāñ meñ utar

chamak uTheñge añdheroñ meñ anginat sūraj

tū barq ban ke mire qalb-e-nā-tavāñ meñ utar

tujhe bhī karb ke dariyā meñ maiñ Dubo dūñgā

jo ho sake to mirī chashm-e-ḳhūñ-fishāñ meñ utar

har ek lamha hai teġh-e-sitam to kyā ġham hai

darāz-dasti-e-qātil ke imtihāñ meñ utar

faqīh-e-shahr se qat-e-nazar kabhī to 'nazar'

tū mere ashk kī be-harf dāstāñ meñ utar

KHud-agahi ke liye bahr-e-bekaran mein utar

shanawari ka hunar hai to jism-o-jaan mein utar

har ek baat mujhe be-yaqin si lagti hai

yaqin ban ke meri zat-e-be-guman mein utar

main dhup dhup ghani pyas pi chuka hun bahut

kabhi to abr-e-rawan dasht-e-be-karan mein utar

har ek lamha gurezan sa lag raha hai mujhe

kabhi to shoala-e-KHanjar ghubar-e-jaan mein utar

nikal ke yas ki in sard sard lahron se

ai zindagi tu har ek shoala-e-jawan mein utar

chamak uThenge andheron mein anginat suraj

tu barq ban ke mere qalb-e-na-tawan mein utar

tujhe bhi karb ke dariya mein main Dubo dunga

jo ho sake to meri chashm-e-KHun-fishan mein utar

har ek lamha hai tegh-e-sitam to kya gham hai

daraaz-dasti-e-qatil ke imtihan mein utar

faqih-e-shahr se qat-e-nazar kabhi to 'nazar'

tu mere ashk ki be-harf dastan mein utar