KHud apna hath bas thame hue main rah gaya hun

ḳhud apnā haath bas thāme hue maiñ rah gayā huuñ

sadī kā dukh huuñ jo āñkhoñ se apnī bah gayā huuñ

kabhī bhī aur kisī kā haq haḌap karnā nahīñ hai

yahī bachchoñ se apne marte marte kah gayā huuñ

vahāñ se hai ġhulāmoñ kā koī jarrār lashkar

magar is samt se laḌne ko maiñ ik shah gayā huuñ

ye sach hai apne bachchoñ ke liye thā ek Dhāras

chalā aayā hai vo tūfān ḳhud par Dheh gayā huuñ

ḳhud apne aap par tanqīd kī hai aap maiñ ne

kahūñ kyā aap apnī baat hañs kar sah gayā huuñ

maze le le ke paḌhte ho khulā ḳhat huuñ maiñ koī

kiyā mash.hūr us ne maiñ yahāñ se tah gayā huuñ

hathelī meñ samoyā us ne us ko pyaas bhī thī

magar 'hasrat' maiñ darzoñ meñ se phir bhī bah gayā huuñ

KHud apna hath bas thame hue main rah gaya hun

sadi ka dukh hun jo aankhon se apni bah gaya hun

kabhi bhi aur kisi ka haq haDap karna nahin hai

yahi bachchon se apne marte marte kah gaya hun

wahan se hai ghulamon ka koi jarrar lashkar

magar is samt se laDne ko main ek shah gaya hun

ye sach hai apne bachchon ke liye tha ek Dhaaras

chala aaya hai wo tufan KHud par Dheh gaya hun

KHud apne aap par tanqid ki hai aap main ne

kahun kya aap apni baat hans kar sah gaya hun

maze le le ke paDhte ho khula KHat hun main koi

kiya mashhur us ne main yahan se tah gaya hun

hatheli mein samoya us ne us ko pyas bhi thi

magar 'hasrat' main darzon mein se phir bhi bah gaya hun