KHud apni kawishon se aab-o-dana DhunD lete hain

ḳhud apnī kāvishoñ se āb-o-dāna DhūñD lete haiñ

parinde apne rahne kā Thikānā DhūñD lete haiñ

hathelī par liye phirte haiñ jo jān-e-azīz apnī

samundar kī tahoñ meñ bhī ḳhazāna DhūñD lete haiñ

diloñ meñ jin ke milne kī tamanna jaag uThtī hai

vo barsoñ baad bhī rishta purānā DhūñD lete haiñ

hunar aatā hai jin ko dushmanoñ se bach nikalne kā

vo hañs kar chaal koī shātirāna DhūñD lete haiñ

bachā kar rakhnā hai ham ko yaqīn-o-e'timād un kā

koī qissa nayā koī fasāna DhūñD lete haiñ

unheñ aate haiñ gar va.ada-ḳhilāfī ke hunar 'qaisar'

to achchhā sā koī ham bhī bahāna DhūñD lete haiñ

KHud apni kawishon se aab-o-dana DhunD lete hain

parinde apne rahne ka Thikana DhunD lete hain

hatheli par liye phirte hain jo jaan-e-aziz apni

samundar ki tahon mein bhi KHazana DhunD lete hain

dilon mein jin ke milne ki tamanna jag uThti hai

wo barson baad bhi rishta purana DhunD lete hain

hunar aata hai jin ko dushmanon se bach nikalne ka

wo hans kar chaal koi shatirana DhunD lete hain

bacha kar rakhna hai hum ko yaqin-o-e'timad un ka

koi qissa naya koi fasana DhunD lete hain

unhen aate hain gar wada-KHilafi ke hunar 'qaisar'

to achchha sa koi hum bhi bahana DhunD lete hain