KHud apni parastish karte hain kuchh dair-o-haram se kaam nahin

ḳhud apnī parastish karte haiñ kuchh dair-o-haram se kaam nahīñ

vo tarz-e-niyāz-e-ḳhās hai ye jo kufr nahīñ islām nahīñ

hoñ pīr-e-muġhāñ yā shaiḳh-e-haram sab bāñdh rahe haiñ apnī havā

kahne ko bahut kuchh kahte haiñ jo baat hai us kā naam nahīñ

ham toḌ deñ qaid-e-hastī bhī ye qaid-e-qafas to chiiz hai kyā

ik jumbish-e-qalb-e-muztar meñ yā ham hī nahīñ yā baam nahīñ

hai josh-e-atā-e-sāqī bhī kab vajh-e-sukūn-e-tishna-labī

yā jaam ba-qadr-e-bāda nahīñ yā baada ba-qadr-e-jām nahīñ

āzād rahe nākām jiye pāband bhalā kyā shaad raheñ

ho sahn-e-chaman yā kunj-e-qafas ham ko to kahīñ ārām nahīñ

himmat hī nahīñ kī varna abhī ik jast meñ manzil jā lete

kaTtī hai kahīñ yuuñ raah bhalā do gaam chale do gaam nahīñ

kyā shāhid-e-rānā chhāñTā hai allāh-re merī dīda-varī

ye husn sar-e-bāzār nahīñ ye zauq-e-tamāshā aam nahīñ

KHud apni parastish karte hain kuchh dair-o-haram se kaam nahin

wo tarz-e-niyaz-e-KHas hai ye jo kufr nahin islam nahin

hon pir-e-mughan ya shaiKH-e-haram sab bandh rahe hain apni hawa

kahne ko bahut kuchh kahte hain jo baat hai us ka nam nahin

hum toD den qaid-e-hasti bhi ye qaid-e-qafas to chiz hai kya

ek jumbish-e-qalb-e-muztar mein ya hum hi nahin ya baam nahin

hai josh-e-ata-e-saqi bhi kab wajh-e-sukun-e-tishna-labi

ya jam ba-qadr-e-baada nahin ya baada ba-qadr-e-jam nahin

aazad rahe nakaam jiye paband bhala kya shad rahen

ho sahn-e-chaman ya kunj-e-qafas hum ko to kahin aaram nahin

himmat hi nahin ki warna abhi ek jast mein manzil ja lete

kaTti hai kahin yun rah bhala do gam chale do gam nahin

kya shahid-e-rana chhanTa hai allah-re meri dida-wari

ye husn sar-e-bazar nahin ye zauq-e-tamasha aam nahin