KHud apni rah ki diwar kar diya gaya hun

ḳhud apnī raah kī dīvār kar diyā gayā huuñ

ye kis azaab se do-chār kar diyā gayā huuñ

vo chashm thī use bīnā.ī le ga.ī apnī

maiñ aa.ina thā so zañgār kar diyā gayā huuñ

maiñ ek raaz thā maḳhfī thā ḳhaak meñ apne

abhī abhī hī maiñ iz.hār kar diyā gayā huuñ

vo din bhī duur nahīñ dost ye kaheñge miyāñ

ki maiñ to aur bhī dushvār kar diyā gayā huuñ

tamām āñkheñ mujhe dekhne ko aatī haiñ

ajab tarah se numūdār kar diyā gayā huuñ

to kyā dikhānā hai sab ko hī rāsta haq kā

to kyā maiñ qāfila-sālār kar diyā gayā huuñ

mire mazār kī ye ḳhaak chhān le duniyā

ki tere haath meñ maiñ maar kar diyā gayā huuñ

ye ishq hai yā koī ramz hai nahīñ ma.alūm

badan se ruuh se sarshār kar diyā gayā huuñ

bahut ġhurūr thā mujh ko vajūd par 'jāved'

isī liye to nigūñ-sār kar diyā gayā huuñ

KHud apni rah ki diwar kar diya gaya hun

ye kis azab se do-chaar kar diya gaya hun

wo chashm thi use binai le gai apni

main aaina tha so zangar kar diya gaya hun

main ek raaz tha maKHfi tha KHak mein apne

abhi abhi hi main izhaar kar diya gaya hun

wo din bhi dur nahin dost ye kahenge miyan

ki main to aur bhi dushwar kar diya gaya hun

tamam aankhen mujhe dekhne ko aati hain

ajab tarah se numudar kar diya gaya hun

to kya dikhana hai sab ko hi rasta haq ka

to kya main qafila-salar kar diya gaya hun

mere mazar ki ye KHak chhan le duniya

ki tere hath mein main mar kar diya gaya hun

ye ishq hai ya koi ramz hai nahin malum

badan se ruh se sarshaar kar diya gaya hun

bahut ghurur tha mujh ko wajud par 'jawed'

isi liye to nigun-sar kar diya gaya hun