KHud apni zat ko pahle mujhe tasKHir karna tha

ḳhud apnī zaat ko pahle mujhe tasḳhīr karnā thā

isī buniyād par phir shahr-e-dil tā'mīr karnā thā

hameñ par bhī katarne the anā ko dafn karnā thā

kisī ke naam ko phir paañv kī zanjīr karnā thā

badan nafrat se sho'la ho mohabbat raakh kar de dil

kisī jazbe ko is darja na ātish-gīr karnā thā

'ufuq tak sarhad-e-dil ho ki ghar kī chār-dīvārī

vafā kā har ‘ilāqa sūrat-e-jāgīr karnā thā

hujūm-e-ḳhvāb se aksar yahī maiñ soch kar niklī

abhī vo ḳhvāb kab dekhā jise tā'bīr karnā thā

phir apnā naqsh kyā rakhtī ki merā 'aks kyā miltā

mujhe jab qarya-e-dil meñ use tasvīr karnā thā

vo qirtās-e-zamīñ ab tak kahāñ nāpaid hai yārab

jo mus.haf taaq meñ rakkhā use tafsīr karnā thā

KHud apni zat ko pahle mujhe tasKHir karna tha

isi buniyaad par phir shahr-e-dil ta'mir karna tha

hamein par bhi katarne the ana ko dafn karna tha

kisi ke nam ko phir panw ki zanjir karna tha

badan nafrat se sho'la ho mohabbat rakh kar de dil

kisi jazbe ko is darja na aatish-gir karna tha

'ufuq tak sarhad-e-dil ho ki ghar ki chaar-diwari

wafa ka har ‘ilaqa surat-e-jagir karna tha

hujum-e-KHwab se aksar yahi main soch kar nikli

abhi wo KHwab kab dekha jise ta'bir karna tha

phir apna naqsh kya rakhti ki mera 'aks kya milta

mujhe jab qarya-e-dil mein use taswir karna tha

wo qirtas-e-zamin ab tak kahan napaid hai yarab

jo mushaf taq mein rakkha use tafsir karna tha