KHud arsh-e-barin ko bhi jhukte hue paya hai

ḳhud arsh-e-barīñ ko bhī jhukte hue paayā hai

sar jab bhī kabhī ham ne sajde meñ jhukāyā hai

duniyā ke irādoñ ko ye bhāñp gayā hogā

pazhmurda sā jo chehra sūraj ne banāyā hai

mai-ḳhāna-e-ulfat ke mai-ḳhvār ko duniyā ne

suulī pe chaḌhāyā hai aur zahr pilāyā hai

nādār kā maulā hai bahutoñ se sunā hai ye

phir kaunsī tāqat ne muflis ko satāyā hai

taqdīr ke hāthoñ se tadbīr piTī lekin

taqdīr kā sar aksar himmat ne jhukāyā hai

is raaz ko ai 'lāġhar' koī bhī nahīñ samjhā

kyā soch ke ḳhāliq ne duniyā ko banāyā hai

KHud arsh-e-barin ko bhi jhukte hue paya hai

sar jab bhi kabhi hum ne sajde mein jhukaya hai

duniya ke iradon ko ye bhanp gaya hoga

pazhmurda sa jo chehra suraj ne banaya hai

mai-KHana-e-ulfat ke mai-KHwar ko duniya ne

suli pe chaDhaya hai aur zahr pilaya hai

nadar ka maula hai bahuton se suna hai ye

phir kaunsi taqat ne muflis ko sataya hai

taqdir ke hathon se tadbir piTi lekin

taqdir ka sar aksar himmat ne jhukaya hai

is raaz ko ai 'laghar' koi bhi nahin samjha

kya soch ke KHaliq ne duniya ko banaya hai