KHud-ba-KHud aankh badal kar ye sawal achchha hai

ḳhud-ba-ḳhud aañkh badal kar ye savāl achchhā hai

roz kab tak koī pūchhā kare haal achchhā hai

hijr meñ aish-e-guzishta kā ḳhayāl achchhā hai

ho jhalak jis meñ ḳhushī kī vo ma.aal achchhā hai

daaġh behtar hai vahī ho jo dil-e-āshiq meñ

jaur hai āriz-e-ḳhūbāñ pe vo ḳhaal achchhā hai

dekh un ḳhaak ke putloñ kī adā.eñ zāhid

un se kis baat meñ hūroñ kā jamāl achchhā hai

kījiye aur bhī shikve ki miTe dil kā ġhubār

bātoñ bātoñ meñ nikal jaa.e malāl achchhā hai

tandurustī se to behtar thī mirī bīmārī

vo kabhī pūchh to lete the ki haal achchhā hai

jo nigāhoñ meñ samā jaa.e vo sūrat achchhī

jo ḳharīdār ko jach jaa.e vo maal achchhā hai

chāragar ko mire ye bhī nahīñ tam.īz abhī

kaun sā haal burā kaun sā haal achchhā hai

de ḳhudā zar to koī mai-kada ābād kareñ

achchhe kāmoñ meñ jo ho sarf vo maal achchhā hai

hañs ke kahte haiñ kabhī haath se uḌne kā nahīñ

tā.ir-e-rañg-e-hinā be-par-o-bāl achchhā hai

jo na nikle kabhī dil se vo tamannā achchhī

jo na aa.e kabhī lab tak vo savāl achchhā hai

hasrat aatī hai hameñ haal par apne kyā kyā

sunte haiñ jab kisī bīmār kā haal achchhā hai

huur ke zikr par ā.īna uThā kar dekhā

us se īmāñ hai ki merā hī jamāl achchhā hai

aarzū merī na puurī ho koī baat hai ye

kaash itnā vo samajh leñ ki savāl achchhā hai

muft miltā hai ḳharābāt meñ har mai-kash ko

Tharrā piine ke liye jām-e-sifāl achchhā hai

saiñkaḌoñ barq-jamāloñ kā guzar hotā hai

tūr-e-sīnā se mirā bām-e-ḳhayāl achchhā hai

huuñ gadā-e-dar-e-mai-ḳhāna takalluf se barī

TūTā-phūTā ye merā jām-e-sifāl achchhā hai

haal sunte nahīñ be-ḳhud haiñ ye masjid vaale

un se kuchh mai-kade vāloñ hī kā haal achchhā hai

daf.atan tark-e-mohabbat meñ zarar hai jī kā

rafta rafta jo miTe dil se ḳhayāl achchhā hai

ab ke har shahr meñ phailā hai jo tā.ūn 'hafīz'

marne vāloñ ko ḳhushī hai ki ye saal achchhā hai

KHud-ba-KHud aankh badal kar ye sawal achchha hai

roz kab tak koi puchha kare haal achchha hai

hijr mein aish-e-guzishta ka KHayal achchha hai

ho jhalak jis mein KHushi ki wo maal achchha hai

dagh behtar hai wahi ho jo dil-e-ashiq mein

jaur hai aariz-e-KHuban pe wo KHal achchha hai

dekh un KHak ke putlon ki adaen zahid

un se kis baat mein huron ka jamal achchha hai

kijiye aur bhi shikwe ki miTe dil ka ghubar

baaton baaton mein nikal jae malal achchha hai

tandurusti se to behtar thi meri bimari

wo kabhi puchh to lete the ki haal achchha hai

jo nigahon mein sama jae wo surat achchhi

jo KHaridar ko jach jae wo mal achchha hai

chaaragar ko mere ye bhi nahin tamiz abhi

kaun sa haal bura kaun sa haal achchha hai

de KHuda zar to koi mai-kada aabaad karen

achchhe kaamon mein jo ho sarf wo mal achchha hai

hans ke kahte hain kabhi hath se uDne ka nahin

tair-e-rang-e-hina be-par-o-baal achchha hai

jo na nikle kabhi dil se wo tamanna achchhi

jo na aae kabhi lab tak wo sawal achchha hai

hasrat aati hai hamein haal par apne kya kya

sunte hain jab kisi bimar ka haal achchha hai

hur ke zikr par aaina uTha kar dekha

us se iman hai ki mera hi jamal achchha hai

aarzu meri na puri ho koi baat hai ye

kash itna wo samajh len ki sawal achchha hai

muft milta hai KHarabaat mein har mai-kash ko

Tharra pine ke liye jam-e-sifal achchha hai

sainkaDon barq-jamalon ka guzar hota hai

tur-e-sina se mera baam-e-KHayal achchha hai

hun gada-e-dar-e-mai-KHana takalluf se bari

TuTa-phuTa ye mera jam-e-sifal achchha hai

haal sunte nahin be-KHud hain ye masjid wale

un se kuchh mai-kade walon hi ka haal achchha hai

dafatan tark-e-mohabbat mein zarar hai ji ka

rafta rafta jo miTe dil se KHayal achchha hai

ab ke har shahr mein phaila hai jo taun 'hafiz'

marne walon ko KHushi hai ki ye sal achchha hai