KHud chale aao yahan ya ki sada do hum ko

ḳhud chale aao yahāñ yā ki sadā do ham ko

ham gunahgār tumhāre haiñ du'ā do ham ko

kyā kareñ ham se ye hotī nahīñ duniyā-dārī

ham jo duniyā ke nahīñ haiñ to miTā do ham ko

ham tumhāre haiñ tumhāre hī qarīb aa baiThe

huuñ jo gustāḳh to mahfil se uThā do ham ko

dāman-e-qais sahī dāman-e-yūsuf na sahī

ab to ye chaak hai jo chāhe sazā do ham ko

apnī hī raakh meñ ye aag na kajlā jaa.e

ab lagā.ī hai to āñchal kī havā do ham ko

ye bhī ham bhuul ga.e naam hamārā kyā thā

pūchh kar gardish-e-daurāñ se batā do ham ko

yā hameñ qaid karo mahbas-e-tanhā.ī meñ

yā usī dushman-e-jānī se milā do ham ko

jin ko āñkhoñ se lagāyā to hameñ chhoḌ ga.e

unhīñ chehroñ unhīñ ḳhvāboñ kā pata do ham ko

KHud chale aao yahan ya ki sada do hum ko

hum gunahgar tumhaare hain du'a do hum ko

kya karen hum se ye hoti nahin duniya-dari

hum jo duniya ke nahin hain to miTa do hum ko

hum tumhaare hain tumhaare hi qarib aa baiThe

hun jo gustaKH to mahfil se uTha do hum ko

daman-e-qais sahi daman-e-yusuf na sahi

ab to ye chaak hai jo chahe saza do hum ko

apni hi rakh mein ye aag na kajla jae

ab lagai hai to aanchal ki hawa do hum ko

ye bhi hum bhul gae nam hamara kya tha

puchh kar gardish-e-dauran se bata do hum ko

ya hamein qaid karo mahbas-e-tanhai mein

ya usi dushman-e-jaani se mila do hum ko

jin ko aankhon se lagaya to hamein chhoD gae

unhin chehron unhin KHwabon ka pata do hum ko