KHud-gharz ho ke apnon ke gham-KHwar hi raho

ḳhud-ġharz ho ke apnoñ ke ġham-ḳhvār hī raho

is paar aa ga.e ho to is paar hī raho

mahsūs ho rahā hai ki raushan-ḳhayāl ho

ham chāhte haiñ tum bhī vafādār hī raho

tum ham ko DhūñDte ho zamāne meñ dar-ba-dar

ai kaash tum hamāre talabgār hī raho

tum se mujhe kabhī bhī shikāyat nahīñ huī

tum ho hasīñ to husn kā me'yār hī raho

kyoñ phir rahe ho ġham liye in be-vafāoñ kā

ġham-ḳhvār ho to in meñ giraftār hī raho

har baar tum ko sab se bachāte rahe haiñ ham

tum paḌ ga.e ho 'ishq meñ lāchār hī raho

dar pe tumhāre aa.e kisī kī bisāt kyā

tum ret ke bhañvar meñ bhī gulzār hī raho

har ik nazar meñ kyā hai ye sab jānte ho aap

har fan meñ aap bā'is-e-fankār hī raho

afsos hai ki tum ne hameñ yaad kar liyā

bas is tarah se har ghaḌī dil-dār hī raho

ham ne tumhāre saath meñ sab kar liye gunāh

ab tum bhī mere saath gunahgār hī raho

maiñ ne tumhāre she'r ko jab se paḌhā hai dost

dil chāhtā hai sāhab-e-guftār hī raho

mujh ko tumhāre husn se kuchh bhī nahīñ ġharaz

tum is liye ḳhafā ho to bezār hī raho

'minhāj' aa gayā hai vo TukḌoñ kī shakl meñ

us ko banā ke tum bhī samajh-dār hī raho

KHud-gharz ho ke apnon ke gham-KHwar hi raho

is par aa gae ho to is par hi raho

mahsus ho raha hai ki raushan-KHayal ho

hum chahte hain tum bhi wafadar hi raho

tum hum ko DhunDte ho zamane mein dar-ba-dar

ai kash tum hamare talabgar hi raho

tum se mujhe kabhi bhi shikayat nahin hui

tum ho hasin to husn ka me'yar hi raho

kyon phir rahe ho gham liye in be-wafaon ka

gham-KHwar ho to in mein giraftar hi raho

har bar tum ko sab se bachate rahe hain hum

tum paD gae ho 'ishq mein lachaar hi raho

dar pe tumhaare aae kisi ki bisat kya

tum ret ke bhanwar mein bhi gulzar hi raho

har ek nazar mein kya hai ye sab jaante ho aap

har fan mein aap ba'is-e-fankar hi raho

afsos hai ki tum ne hamein yaad kar liya

bas is tarah se har ghaDi dil-dar hi raho

hum ne tumhaare sath mein sab kar liye gunah

ab tum bhi mere sath gunahgar hi raho

main ne tumhaare she'r ko jab se paDha hai dost

dil chahta hai sahab-e-guftar hi raho

mujh ko tumhaare husn se kuchh bhi nahin gharaz

tum is liye KHafa ho to bezar hi raho

'minhaj' aa gaya hai wo TukDon ki shakl mein

us ko bana ke tum bhi samajh-dar hi raho