KHud hi apna raaz KHud hi raazdan ban jaunga

ḳhud hī apnā raaz ḳhud hī rāzdāñ ban jā.ūñgā

ek lamhe kā yaqīñ huuñ phir gumāñ ban jā.ūñgā

harf kī sūrat zabāñ par ek baar aane to do

dekhte hī dekhte maiñ dāstāñ ban jā.ūñgā

ibtidā meñ ik alāmat thā guzarte vaqt kī

intihā tak agle vaqtoñ kā nishāñ ban jā.ūñgā

jab tarāshā jā rahā thā zehn meñ merā badan

kis ne sochā thā ki maiñ suunā makāñ ban jā.ūñgā

hote hote vahm meñ tahlīl ho jāoge tum

aur maiñ bhī ek sa.ī-e-rā.egāñ ban jā.ūñgā

'hairat' aisā hī mashiyyat kā hai shāyad qā.eda

jhilmilātī lau se ubhrā huuñ dhuāñ ban jā.ūñgā

KHud hi apna raaz KHud hi raazdan ban jaunga

ek lamhe ka yaqin hun phir guman ban jaunga

harf ki surat zaban par ek bar aane to do

dekhte hi dekhte main dastan ban jaunga

ibtida mein ek alamat tha guzarte waqt ki

intiha tak agle waqton ka nishan ban jaunga

jab tarasha ja raha tha zehn mein mera badan

kis ne socha tha ki main suna makan ban jaunga

hote hote wahm mein tahlil ho jaoge tum

aur main bhi ek sai-e-raegan ban jaunga

'hairat' aisa hi mashiyyat ka hai shayad qaeda

jhilmilati lau se ubhra hun dhuan ban jaunga