KHud hi chal kar to mere pas wo aane se raha

ḳhud hī chal kar to mire paas vo aane se rahā

maiñ bhī ab apnī anā chhoḌ ke jaane se rahā

merī āñkhoñ meñ charāġhāñ hai yahī kaafī hai

tere qadmoñ meñ na.e phuul bichhāne se rahā

tum use jā ke kaho aa ke manā.e mujh ko

ḳhud se rūThā huuñ to maiñ ḳhud ko manāne se rahā

āstīnoñ se kaho apnī hifāzat kar leñ

yaar sāñpoñ se to maiñ in ko bachāne se rahā

rā.egānī kā safar mujh se nahīñ ho saktā

ab mohabbat meñ nayā ranj uThāne se rahā

ābla-pā.ī bhī gulshan hai mujhe dasht-mizāj

zaḳhm mahke haiñ to phūloñ ko dikhāne se rahā

dil meñ ghaav hī sahī talḳh tabī.at bhī sahī

apne yāroñ pe to maiñ haath uThāne se rahā

ret bhī chūmtī rahtī hai mire paañv 'safī'

maiñ samandar ko to manzar ye dikhāne se rahā

KHud hi chal kar to mere pas wo aane se raha

main bhi ab apni ana chhoD ke jaane se raha

meri aankhon mein charaghan hai yahi kafi hai

tere qadmon mein nae phul bichhane se raha

tum use ja ke kaho aa ke manae mujh ko

KHud se ruTha hun to main KHud ko manane se raha

aastinon se kaho apni hifazat kar len

yar sanpon se to main in ko bachane se raha

raegani ka safar mujh se nahin ho sakta

ab mohabbat mein naya ranj uThane se raha

aabla-pai bhi gulshan hai mujhe dasht-mizaj

zaKHm mahke hain to phulon ko dikhane se raha

dil mein ghaw hi sahi talKH tabiat bhi sahi

apne yaron pe to main hath uThane se raha

ret bhi chumti rahti hai mere panw 'safi'

main samandar ko to manzar ye dikhane se raha