KHud hi sang-o-KHisht KHud hi sar-junun-e-sar hun main

ḳhud hī sang-o-ḳhisht ḳhud hī sar-junūn-e-sar huuñ maiñ

ḳhud hī maiñ naḳhchīr daana ḳhud hī bāl-o-par huuñ maiñ

muntazir huuñ ek qatre kā jo de izn-e-safar

jo tah-e-sahrā hai mahv-e-ḳhvāb vo sāgar huuñ maiñ

chāñd ko ābād kar lekin merī fikr-o-nazar

dekh muddat se hai jo vīrāñ paḌā vo ghar huuñ maiñ

itnā sāda-dil ki dard-e-dil ke haq meñ jaan duuñ

par dar-e-kā'ba na jā.ūñ is qadar ḳhud-sar huuñ maiñ

is qadar vahshī ki ḳhud pī jā.ūñ apnā ḳhūn-e-dil

itnā shā.ista ki shahr-e-'ishq kā dilbar huuñ maiñ

tishna-lab par kuchh adab vājib nahīñ dariyāoñ kā

ye sabab hai jo rivāyat se khaḌā bāhar huuñ maiñ

chiyuñTiyoñ ke reñgne kī bhī sadā aa.e jahāñ

itne chup sahme nagar meñ zarb āhan-gar huuñ maiñ

is qadar tanhā ki Dar jaatā huuñ apnī saañs se

itnā pechīda ki apnī zaat meñ lashkar huuñ maiñ

saañs aatī bhī nahīñ aur jaañ se jaatī bhī nahīñ

hijr bāhar thā to hijrat dard ke andar huuñ maiñ

chand ghaḌiyāñ aur hai ye habs kā mausam 'faqīh'

ruḳh havā kā dekh saktā hai jo dīda-var huuñ maiñ

KHud hi sang-o-KHisht KHud hi sar-junun-e-sar hun main

KHud hi main naKHchir dana KHud hi baal-o-par hun main

muntazir hun ek qatre ka jo de izn-e-safar

jo tah-e-sahra hai mahw-e-KHwab wo sagar hun main

chand ko aabaad kar lekin meri fikr-o-nazar

dekh muddat se hai jo viran paDa wo ghar hun main

itna sada-dil ki dard-e-dil ke haq mein jaan dun

par dar-e-ka'ba na jaun is qadar KHud-sar hun main

is qadar wahshi ki KHud pi jaun apna KHun-e-dil

itna shaista ki shahr-e-'ishq ka dilbar hun main

tishna-lab par kuchh adab wajib nahin dariyaon ka

ye sabab hai jo riwayat se khaDa bahar hun main

chiyunTiyon ke rengne ki bhi sada aae jahan

itne chup sahme nagar mein zarb aahan-gar hun main

is qadar tanha ki Dar jata hun apni sans se

itna pechida ki apni zat mein lashkar hun main

sans aati bhi nahin aur jaan se jati bhi nahin

hijr bahar tha to hijrat dard ke andar hun main

chand ghaDiyan aur hai ye habs ka mausam 'faqih'

ruKH hawa ka dekh sakta hai jo dida-war hun main