KHud hi shamil nahin ho pae hum apne dukh mein

ḳhud hī shāmil nahīñ ho paa.e ham apne dukh meñ

jaane le baiThe ye kyā aaj purānī bāteñ

kis qadar ho ga.e ye fāsle ab ham ko 'azīz

tum jo barsoñ pe milo ham ko to hairat na kareñ

chāho to ek hī āvāz meñ qaa.il kar lo

mahv-e-ġhaflat bhī huuñ kuchh khul bhī rahī haiñ āñkheñ

'ishq ke lams ko hastī se miTā deñ kaise

maan lī baat ki ham qat-e-ta’alluq kar leñ

vahī āvāz hai maiñ sun to rahā huuñ lekin

dil kī dhaḌkan ne zarā Daal diyā hai shak meñ

mil sī jaatī hai kaḌī ‘ālam-e-dīvāngī kī

yaad jab aatī haiñ kuchh bhūltī sī vo āñkheñ

jaane is 'ishq meñ kyā apne yaqīñ par guzrī

yā'nī ye soch ke ḳhāmosh haiñ kyā baat kareñ

ik tamannā hai ta'alluq ke sahāre tum se

kyā ta'alluq sā banā rakkhā hai dil hī dil meñ

haañ in āñkhoñ ne ka.ī baar to ye bhī chāhā

koī aatā nazar aa.e na jidhar bhī dekheñ

tujh ko pā kar jo hue vahm-o-gumāñ vo mat pūchh

ḳhud ko paayā na kabhī ham ne tirī bātoñ meñ

ek ik baat jo ḳhud kahte phire haiñ apnī

kaisī hasrat thī ki ho koī to kuchh baat kareñ

aah kis shauq-e-ta'alluq meñ miTe ham ai dil

koī aayā na gayā yūñhī banā liiñ bāteñ

ek ‘arse pe mile aaj to yuuñ jaan paḌā

jis tarah us ne har ik haal meñ dekhā ho hameñ

kuchh ho ‘unvān-e-suḳhan baat banānā mā'lūm

ik ta'alluq se thī jo kuchh bhī thī ḳhūbī ham meñ

aah ye be-asarī aur us āvāz kī 'talḳh'

ban ke kauñdā sā lapaktī thī jo dil hī dil meñ

KHud hi shamil nahin ho pae hum apne dukh mein

jaane le baiThe ye kya aaj purani baaten

kis qadar ho gae ye fasle ab hum ko 'aziz

tum jo barson pe milo hum ko to hairat na karen

chaho to ek hi aawaz mein qail kar lo

mahw-e-ghaflat bhi hun kuchh khul bhi rahi hain aankhen

'ishq ke lams ko hasti se miTa den kaise

man li baat ki hum qat-e-ta’alluq kar len

wahi aawaz hai main sun to raha hun lekin

dil ki dhaDkan ne zara Dal diya hai shak mein

mil si jati hai kaDi ‘alam-e-diwangi ki

yaad jab aati hain kuchh bhulti si wo aankhen

jaane is 'ishq mein kya apne yaqin par guzri

ya'ni ye soch ke KHamosh hain kya baat karen

ek tamanna hai ta'alluq ke sahaare tum se

kya ta'alluq sa bana rakkha hai dil hi dil mein

han in aankhon ne kai bar to ye bhi chaha

koi aata nazar aae na jidhar bhi dekhen

tujh ko pa kar jo hue wahm-o-guman wo mat puchh

KHud ko paya na kabhi hum ne teri baaton mein

ek ek baat jo KHud kahte phire hain apni

kaisi hasrat thi ki ho koi to kuchh baat karen

aah kis shauq-e-ta'alluq mein miTe hum ai dil

koi aaya na gaya yunhi bana lin baaten

ek ‘arse pe mile aaj to yun jaan paDa

jis tarah us ne har ek haal mein dekha ho hamein

kuchh ho ‘unwan-e-suKHan baat banana ma'lum

ek ta'alluq se thi jo kuchh bhi thi KHubi hum mein

aah ye be-asari aur us aawaz ki 'talKH'

ban ke kaunda sa lapakti thi jo dil hi dil mein