KHud KHatm kar ke qissa-e-sham-o-sahar ko main

ḳhud ḳhatm kar ke qissa-e-shām-o-sahar ko maiñ

ye bhī pata nahīñ ki chalā huuñ kidhar ko maiñ

haavī shab-e-firāq kī zulmat hai zehn par

vaqt-e-sahar bhī DhūñD rahā huuñ sahar ko maiñ

māyūs ham-safar na ho parvāz se mirī

tartīb de rahā huuñ abhī bāl-o-par ko maiñ

ye aur baat hai ki tabassum laboñ pe hai

kyā jāntā nahīñ huuñ tumhārī nazar ko maiñ

dānista Thokaroñ kā uThāyā hai maiñ ne lutf

bhūlā nahīñ huuñ dost tirī rahguzar ko maiñ

itnā ḳharāb to nahīñ bīmār-e-ġham kā haal

māyūs dekhtā huuñ magar chārāgar ko maiñ

phir sāmne haiñ aaj ba-sad-ehtimām vo

dil ko sañbhālūñ 'fauq' ki ro.uuñ jigar ko maiñ

KHud KHatm kar ke qissa-e-sham-o-sahar ko main

ye bhi pata nahin ki chala hun kidhar ko main

hawi shab-e-firaq ki zulmat hai zehn par

waqt-e-sahar bhi DhunD raha hun sahar ko main

mayus ham-safar na ho parwaz se meri

tartib de raha hun abhi baal-o-par ko main

ye aur baat hai ki tabassum labon pe hai

kya jaanta nahin hun tumhaari nazar ko main

danista Thokaron ka uThaya hai main ne lutf

bhula nahin hun dost teri rahguzar ko main

itna KHarab to nahin bimar-e-gham ka haal

mayus dekhta hun magar chaaragar ko main

phir samne hain aaj ba-sad-ehtimam wo

dil ko sanbhaalun 'fauq' ki roun jigar ko main