KHud ko kabhi jo KHud se milana paDa hamein

ḳhud ko kabhī jo ḳhud se milānā paḌā hameñ

chehre ke paas ā.īna laanā paḌā hameñ

tanhā.iyoñ kā dard bhulāne ke vāste

ḳhud apne ghar meñ shor machānā paḌā hameñ

muddat ke baad ho gayā jab un se sāmnā

nākām hasratoñ ko jagānā paḌā hameñ

is dasht-e-kā.enāt meñ jiine ke vāste

soz-e-ġham-e-hayāt bhulānā paḌā hameñ

ban jaa.e phir na ek tamāsha ye soch kar

duniyā se apnā dard chhupānā paḌā hameñ

kuchh tīrgī-pasand kal aa.e the is liye

bastī kā har charāġh bujhānā paḌā hameñ

sūraj kā zulm aur baḌhegā ye jab sunā

āñgan meñ ek peḌ lagānā paḌā hameñ

aisā bhī vaqt ālam-e-ġhurbat meñ aa gayā

bachchoñ ko bhūke peT sulānā paḌā hameñ

'rahbar' hamāre vāste manzil nahīñ chalī

manzil kī samt chal ke ḳhud aanā paḌā hameñ

KHud ko kabhi jo KHud se milana paDa hamein

chehre ke pas aaina lana paDa hamein

tanhaiyon ka dard bhulane ke waste

KHud apne ghar mein shor machana paDa hamein

muddat ke baad ho gaya jab un se samna

nakaam hasraton ko jagana paDa hamein

is dasht-e-kaenat mein jine ke waste

soz-e-gham-e-hayat bhulana paDa hamein

ban jae phir na ek tamasha ye soch kar

duniya se apna dard chhupana paDa hamein

kuchh tirgi-pasand kal aae the is liye

basti ka har charagh bujhana paDa hamein

suraj ka zulm aur baDhega ye jab suna

aangan mein ek peD lagana paDa hamein

aisa bhi waqt aalam-e-ghurbat mein aa gaya

bachchon ko bhuke peT sulana paDa hamein

'rahbar' hamare waste manzil nahin chali

manzil ki samt chal ke KHud aana paDa hamein