KHud ko na main giraun KHud apni nigah se

ḳhud ko na maiñ girā.ūñ ḳhud apnī nigāh se

yārab bachā.e rakhnā mujhe is gunāh se

harf-e-talab zabān pe laayā ġhazab kiyā

ik dost aaj aur gayā rasm-o-rāh se

tashbīh-e-mehr-o-māh kā ye ehtimām hai

patthar uThā ke laa.e haiñ ham un kī raah se

chhoḌā jo us ne ziist bhī ye kah ke uTh ga.ī

maiñ ne bhī aaj haath uThāyā nibāh se

samjhe na koī baat to ye aur baat hai

kuchh to nigāh kahtī thī paiham nigāh se

shāyad nahīñ ye baat mire qātiloñ ko yaad

qismat nikāl laatī hai yūsuf ko chaah se

KHud ko na main giraun KHud apni nigah se

yarab bachae rakhna mujhe is gunah se

harf-e-talab zaban pe laya ghazab kiya

ek dost aaj aur gaya rasm-o-rah se

tashbih-e-mehr-o-mah ka ye ehtimam hai

patthar uTha ke lae hain hum un ki rah se

chhoDa jo us ne zist bhi ye kah ke uTh gai

main ne bhi aaj hath uThaya nibah se

samjhe na koi baat to ye aur baat hai

kuchh to nigah kahti thi paiham nigah se

shayad nahin ye baat mere qatilon ko yaad

qismat nikal lati hai yusuf ko chah se