KHud ko socha hai ki kuchh tanha karun

ḳhud ko sochā hai ki kuchh tanhā karūñ

dil se ab mehmān ko chaltā karūñ

vaqt tak miltā nahīñ apne liye

is qadar masrūf huuñ maiñ kyā karūñ

koī kar tadbīr mil baiTheñ kahīñ

tujh se mil kar dil kā ġham halkā karūñ

ab sahī jātīñ nahīñ ye ranjisheñ

ḳhud ko kosūñ yā unheñ kosā karūñ

kar diyā rusvā mujhe tū ne magar

maiñ tujhe duniyā meñ kyuuñ rusvā karūñ

ho mayassar jāvedānī kā safar

ḳhud ko apnī zaat se minhā karūñ

jang rishtoñ aur anā meñ chhiḌ ga.ī

hārne kā hausla paidā karūñ

us ne pūchhā yaad kartī ho mujhe

kyā tumheñ milne kabhī aayā karūñ

kah diyā maiñ ne guzar jaatā hai din

raat kī tanhā.iyoñ kā kyā karūñ

dard ne dil meñ na chhoḌī kuchh jagah

tum rahoge ab kahāñ sochā karūñ

ghar kī chaukhaT par maiñ ab bhī baiTh kar

roz us kā rāstā dekhā karūñ

dost mere kho ga.e jaane kahāñ

bojh dil kā kis tarah halkā karūñ

jāvedāñ ho jā.ūñ shohrat bhī mile

gar usūloñ kā jo maiñ saudā karūñ

gar mujhe fursat mile 'shamsa-najam'

to use har vaqt maiñ sochā karūñ

KHud ko socha hai ki kuchh tanha karun

dil se ab mehman ko chalta karun

waqt tak milta nahin apne liye

is qadar masruf hun main kya karun

koi kar tadbir mil baiThen kahin

tujh se mil kar dil ka gham halka karun

ab sahi jatin nahin ye ranjishen

KHud ko kosun ya unhen kosa karun

kar diya ruswa mujhe tu ne magar

main tujhe duniya mein kyun ruswa karun

ho mayassar jawedani ka safar

KHud ko apni zat se minha karun

jang rishton aur ana mein chhiD gai

haarne ka hausla paida karun

us ne puchha yaad karti ho mujhe

kya tumhein milne kabhi aaya karun

kah diya main ne guzar jata hai din

raat ki tanhaiyon ka kya karun

dard ne dil mein na chhoDi kuchh jagah

tum rahoge ab kahan socha karun

ghar ki chaukhaT par main ab bhi baiTh kar

roz us ka rasta dekha karun

dost mere kho gae jaane kahan

bojh dil ka kis tarah halka karun

jawedan ho jaun shohrat bhi mile

gar usulon ka jo main sauda karun

gar mujhe fursat mile 'shamsa-najam'

to use har waqt main socha karun