KHud ko tu mohkam bana le dur kar le KHamiyan

ḳhud ko tū mohkam banā le duur kar le ḳhāmiyāñ

har qadam rahtā nahīñ hai saath koī pāsbāñ

kab na jaane kam huiiñ bāham jo thiiñ nazdīkiyāñ

rah ga.ī thī kyā kamī kyoñ aa ga.ī haiñ dūriyāñ

sāmne ik dūsre ke rakh diiñ sab kamzoriyāñ

rah ga.ī ab kaun-sī duurī hamāre darmiyāñ

faisle mushkil hī ham ko manziloñ tak le ga.e

ham ko pachhtānā paḌā hai jab chunī āsāniyāñ

kī nahīñ ḳhud kī bhī parvā vaar dī hai zindagī

'umr bhar aise nibhā.ī ham ne zimmedāriyāñ

saarī lahroñ ko na laao aaj tum sāhil talak

kuchh to ho dil meñ taḌap koī to ho mauj-e-nihāñ

kitne rishtoñ ko gañvā kar ham ne sīkhā ye sabaq

itnī mat rakkho tavaqqo' itnā mat rakkho gumān

har zarūrat ko dabā kar sabr ko mat aazmā

ḳhatm kar detā hai sab kuchh phuuT kar ātish-fishāñ

kar ke hāsil daulat-o-shohrat bhī ḳhalvat sī rahī

har qadam paḌtī rahīñ paiham mirī tanhā.iyāñ

KHud ko tu mohkam bana le dur kar le KHamiyan

har qadam rahta nahin hai sath koi pasban

kab na jaane kam huin baham jo thin nazdikiyan

rah gai thi kya kami kyon aa gai hain duriyan

samne ek dusre ke rakh din sab kamzoriyan

rah gai ab kaun-si duri hamare darmiyan

faisle mushkil hi hum ko manzilon tak le gae

hum ko pachhtana paDa hai jab chuni aasaniyan

ki nahin KHud ki bhi parwa war di hai zindagi

'umr bhar aise nibhai hum ne zimmedariyan

sari lahron ko na lao aaj tum sahil talak

kuchh to ho dil mein taDap koi to ho mauj-e-nihan

kitne rishton ko ganwa kar hum ne sikha ye sabaq

itni mat rakkho tawaqqo' itna mat rakkho guman

har zarurat ko daba kar sabr ko mat aazma

KHatm kar deta hai sab kuchh phuT kar aatish-fishan

kar ke hasil daulat-o-shohrat bhi KHalwat si rahi

har qadam paDti rahin paiham meri tanhaiyan