KHud mein jhanka to ajab manzar nazar aaya mujhe

ḳhud meñ jhāñkā to 'ajab manzar nazar aayā mujhe

apne andar bhī ajā.ib ghar nazar aayā mujhe

mujh se us kā ham-safar banñā bhī kab dekhā gayā

vo bhī apnī raah kā patthar nazar aayā mujhe

hādsoñ ne us ke paañv se bhī dhartī khīñch lī

vo bhī sail-e-vaqt kī zad par nazar aayā mujhe

mehrbāñ koī sharīk-e-qaid-e-tanhā.ī na thā

apne zaanū par hī apnā sar nazar aayā mujhe

dil se thī ummīd ḳhvāhish ke safar par saath de

par ye shāhīñ bhī shikasta-par nazar aayā mujhe

ek ik lamhe ne sau sau sho'bade dikhlā.e haiñ

sach to ye hai vaqt jādūgar nazar aayā mujhe

itnī himmat bhī na thī baḌh kar bulā letā 'riyāz'

yuuñ to vo bāzār meñ aksar nazar aayā mujhe

KHud mein jhanka to 'ajab manzar nazar aaya mujhe

apne andar bhi ajaib ghar nazar aaya mujhe

mujh se us ka ham-safar banna bhi kab dekha gaya

wo bhi apni rah ka patthar nazar aaya mujhe

hadson ne us ke panw se bhi dharti khinch li

wo bhi sail-e-waqt ki zad par nazar aaya mujhe

mehrban koi sharik-e-qaid-e-tanhai na tha

apne zanu par hi apna sar nazar aaya mujhe

dil se thi ummid KHwahish ke safar par sath de

par ye shahin bhi shikasta-par nazar aaya mujhe

ek ek lamhe ne sau sau sho'bade dikhlae hain

sach to ye hai waqt jadugar nazar aaya mujhe

itni himmat bhi na thi baDh kar bula leta 'riyaz'

yun to wo bazar mein aksar nazar aaya mujhe