KHud miT gai na pa saki tere nishan ko main

ḳhud miT ga.ī na pā sakī tere nishāñ ko maiñ

samjhī thī sahl shauq kī rāh-e-garāñ ko meñ

ye ārzū-e-josh-e-tajassus kā hai ma.aal

bhūlā hai kārvāñ mujhe aur kārvāñ ko maiñ

soz-e-junūñ kī aag se ik roz phūñk duuñ

vahm-o-gumāñ ko jazba-e-sūd-o-ziyāñ ko maiñ

tāroñ kī mast chhāñv meñ ab bhī kabhī kabhī

kartī huuñ yaad bhūlī huī dāstāñ ko maiñ

lail-o-nahār merī jabīñ sajda-rez hai

ka.aba samajh rahī huuñ tire āstāñ ko maiñ

Thukrā ke do jahāñ ke nasheb-o-farāz ko

jaane lagī huuñ vādī-e-jannat-nishāñ ko maiñ

'najma' na pūchh mujh se mirī dāstān-e-zīst

al-muḳhtasar ki yaad rahūñgī jahāñ ko maiñ

KHud miT gai na pa saki tere nishan ko main

samjhi thi sahl shauq ki rah-e-garan ko mein

ye aarzu-e-josh-e-tajassus ka hai maal

bhula hai karwan mujhe aur karwan ko main

soz-e-junun ki aag se ek roz phunk dun

wahm-o-guman ko jazba-e-sud-o-ziyan ko main

taron ki mast chhanw mein ab bhi kabhi kabhi

karti hun yaad bhuli hui dastan ko main

lail-o-nahaar meri jabin sajda-rez hai

kaba samajh rahi hun tere aastan ko main

Thukra ke do jahan ke nasheb-o-faraaz ko

jaane lagi hun wadi-e-jannat-nishan ko main

'najma' na puchh mujh se meri dastan-e-zist

al-muKHtasar ki yaad rahungi jahan ko main