KHud mujhko bhi malum nahin hai ki main kya hun

ḳhud mujh ko bhī mā'lūm nahīñ hai ki maiñ kyā huuñ

ab tak to ḳhud apnī hī nigāhoñ se chhupā huuñ

hālāt ke narġhe meñ kuchh is tarah ghirā huuñ

mahsūs ye hotā hai tujhe bhuul chukā huuñ

samjhā thā ki rūdād na.e daur kī hogī

aayā hai tirā naam to maiñ chauñk uThā huuñ

shāyad kabhī bachpan meñ kahīñ saath rahā hai

ā.īne meñ ik shakl ko pahchān rahā huuñ

zulfoñ ke mahakte hue saa.e kī talab meñ

taptī huī rāhoñ pe bahut duur gayā huuñ

mahjūb sā tanhā.ī kā ehsās khaḌā hai

bistar pe baḌī der se ḳhāmosh paḌā huuñ

ab sochne baiThā huuñ ki masraf mirā kyā hai

majbūr-e-mohabbat huuñ na pāband-e-vafā huuñ

suniye to 'muzaffar' kā har ik she'r kahegā

maiñ TuuTe hue saaz kī bechain sadā huuñ

KHud mujh ko bhi ma'lum nahin hai ki main kya hun

ab tak to KHud apni hi nigahon se chhupa hun

haalat ke narghe mein kuchh is tarah ghira hun

mahsus ye hota hai tujhe bhul chuka hun

samjha tha ki rudad nae daur ki hogi

aaya hai tera nam to main chaunk uTha hun

shayad kabhi bachpan mein kahin sath raha hai

aaine mein ek shakl ko pahchan raha hun

zulfon ke mahakte hue sae ki talab mein

tapti hui rahon pe bahut dur gaya hun

mahjub sa tanhai ka ehsas khaDa hai

bistar pe baDi der se KHamosh paDa hun

ab sochne baiTha hun ki masraf mera kya hai

majbur-e-mohabbat hun na paband-e-wafa hun

suniye to 'muzaffar' ka har ek she'r kahega

main TuTe hue saz ki bechain sada hun