KHud se ho kar zindagi bhar be-KHabar meri tarah

ḳhud se ho kar zindagī bhar be-ḳhabar merī tarah

kaun kāTegā ye sahrā kā safar merī tarah

baad mere dasht se rishta ravā rakkhegā kaun

kaun degā saath is kā umr bhar merī tarah

duur tak nām-o-nishāñ bhī chhāñv kā koī nahīñ

kis qadar vīrān hai ye rahguzar merī tarah

mujh se rishta toḌ kar pachhtā.egī tū zindagī

phir nahīñ milne kā tujh ko ham-safar merī tarah

terī be-parvā.iyoñ se ai mire shahr-e-azīz

koī uktā kar na jaa.e chashm-e-tar merī tarah

chārāgar zaḳhmoñ ko mere gar samajhnā hai tujhe

dard ke dariyā meñ phir tū bhī utar merī tarah

kyā huā jugnū miyāñ kyā tum bhī dhoka khā ga.e

jāgte rahte ho kyūñkar raat bhar merī tarah

gaañv ke us moḌ par muddat se hai Thahrā huā

jaane kis kā muntazir hai vo shajar merī tarah

chāhne vaale mileñge tujh ko lākhoñ ai ġhazal

mil na pā.egā koī pāgal magar merī tarah

mujh ko jī bhar dekh le ai shahr ki phir mere baad

tujh ko milne kā nahīñ āshufta-sar merī tarah

KHud se ho kar zindagi bhar be-KHabar meri tarah

kaun kaTega ye sahra ka safar meri tarah

baad mere dasht se rishta rawa rakkhega kaun

kaun dega sath is ka umr bhar meri tarah

dur tak nam-o-nishan bhi chhanw ka koi nahin

kis qadar viran hai ye rahguzar meri tarah

mujh se rishta toD kar pachhtaegi tu zindagi

phir nahin milne ka tujh ko ham-safar meri tarah

teri be-parwaiyon se ai mere shahr-e-aziz

koi ukta kar na jae chashm-e-tar meri tarah

chaaragar zaKHmon ko mere gar samajhna hai tujhe

dard ke dariya mein phir tu bhi utar meri tarah

kya hua jugnu miyan kya tum bhi dhoka kha gae

jagte rahte ho kyunkar raat bhar meri tarah

ganw ke us moD par muddat se hai Thahra hua

jaane kis ka muntazir hai wo shajar meri tarah

chahne wale milenge tujh ko lakhon ai ghazal

mil na paega koi pagal magar meri tarah

mujh ko ji bhar dekh le ai shahr ki phir mere baad

tujh ko milne ka nahin aashufta-sar meri tarah