KHud se jo aashna nahin hota

ḳhud se jo āshnā nahīñ hotā

us kā koī ḳhudā nahīñ hotā

aasrā hai to bas ḳhudā kā hai

aur koī aasrā nahīñ hotā

rāsta dete haiñ samundar bhī

hausla ho to kyā nahīñ hotā

log aate haiñ log jaate haiñ

dil kisī se ḳhafā nahīñ hotā

maiñ use bevafā kahūñ kaise

har koī bā-vafā nahīñ hotā

us taraf ḳhud hī paañv chalte haiñ

jis taraf rāsta nahīñ hotā

kis qadar bā-vafā hai dil kā makīñ

koī lamha judā nahīñ hotā

jo ḳhudā hai vahī rahegā ḳhudā

koī banda ḳhudā nahīñ hotā

'momin-e-dehlavī' pe naaz na kar

koī banda burā nahīñ hotā

phir bhī vo 'mast' saath rahtā hai

kyā kareñ sāmnā nahīñ hotā

KHud se jo aashna nahin hota

us ka koi KHuda nahin hota

aasra hai to bas KHuda ka hai

aur koi aasra nahin hota

rasta dete hain samundar bhi

hausla ho to kya nahin hota

log aate hain log jate hain

dil kisi se KHafa nahin hota

main use bewafa kahun kaise

har koi ba-wafa nahin hota

us taraf KHud hi panw chalte hain

jis taraf rasta nahin hota

kis qadar ba-wafa hai dil ka makin

koi lamha juda nahin hota

jo KHuda hai wahi rahega KHuda

koi banda KHuda nahin hota

'momin-e-dehlawi' pe naz na kar

koi banda bura nahin hota

phir bhi wo 'mast' sath rahta hai

kya karen samna nahin hota