KHud se na-KHush ghair se bezar hona tha hue

ḳhud se nā-ḳhush ġhair se bezār honā thā hue

ham ko gard-e-kūcha-o-bāzār honā thā hue

jin kī saarī zindagī darbār-dārī meñ kaTī

un ko rusvā bar-sar-e-darbār honā thā hue

ham meñ kuchh rindān-e-ḳhush-auqāt aise the jinheñ

jānashīn-e-jubba-o-dastār honā thā hue

ham kabhī shamshīr-e-jauhar-dār the lekin hameñ

dast-e-nāhanjār meñ talvār honā thā hue

apnā ghar jī khol kar tārāj karnā thā kiyā

apne hāthoñ ḳhud hameñ mismār honā thā hue

jin ko saarī zindagī zom-e-masīhā.ī rahā

un ko āḳhir ek din bīmār honā thā hue

tum sar-e-sāhil Dubo baiThe ho 'mohsin' kashtiyāñ

jin safīnoñ ko samundar paar honā thā hue

KHud se na-KHush ghair se bezar hona tha hue

hum ko gard-e-kucha-o-bazar hona tha hue

jin ki sari zindagi darbar-dari mein kaTi

un ko ruswa bar-sar-e-darbar hona tha hue

hum mein kuchh rindan-e-KHush-auqat aise the jinhen

jaanashin-e-jubba-o-dastar hona tha hue

hum kabhi shamshir-e-jauhar-dar the lekin hamein

dast-e-nahanjar mein talwar hona tha hue

apna ghar ji khol kar taraj karna tha kiya

apne hathon KHud hamein mismar hona tha hue

jin ko sari zindagi zom-e-masihai raha

un ko aaKHir ek din bimar hona tha hue

tum sar-e-sahil Dubo baiThe ho 'mohsin' kashtiyan

jin safinon ko samundar par hona tha hue