KHud-shanasi ho to har moajiza imkan mein hai

ḳhud-shanāsī ho to har mo.ajiza imkān meñ hai

ek chhoTī sī ḳhudā.ī har ik insān meñ hai

tū agar ba’ad-e-ḳhudā ḳhud ko na samjhe bar-haq

phir samajh le ki ḳhalal kuchh tire īmān meñ hai

hai mirī jaañ meñ tire jism kī kaifiyyat-e-lams

go mire paas hai tū aur na mire dhyān meñ hai

fasl-e-gul aa.ī to ham nazr kareñge ab ke

vo jo ik taar abhī apne garebān meñ hai

dāstāñ-go ko tire zikr se fursat to mile

naam merā bhī us afsāne ke unvān meñ hai

dil ne rakkhā na qadam shahr-e-badan se bāhar

zaat is ke sabab āvāra bayābān meñ hai

koī samjhā.e to 'shaukat' mire chārāgar ko

ye badan dekhtā hai aur ḳhalish jaan meñ hai

KHud-shanasi ho to har moajiza imkan mein hai

ek chhoTi si KHudai har ek insan mein hai

tu agar ba’ad-e-KHuda KHud ko na samjhe bar-haq

phir samajh le ki KHalal kuchh tere iman mein hai

hai meri jaan mein tere jism ki kaifiyyat-e-lams

go mere pas hai tu aur na mere dhyan mein hai

fasl-e-gul aai to hum nazr karenge ab ke

wo jo ek tar abhi apne gareban mein hai

dastan-go ko tere zikr se fursat to mile

nam mera bhi us afsane ke unwan mein hai

dil ne rakkha na qadam shahr-e-badan se bahar

zat is ke sabab aawara bayaban mein hai

koi samjhae to 'shaukat' mere chaaragar ko

ye badan dekhta hai aur KHalish jaan mein hai