KHud ye faqa-kash-o-nadar kahan bolte hain

ḳhud ye fāqa-kash-o-nādār kahāñ bolte haiñ

dukh to jitne haiñ ba-andāz-e-fuġhāñ bolte haiñ

gūñge jazbe jo mohabbat meñ ravāñ bolte haiñ

haa.e kyoñ teġh-o-tabar tīr-o-kamāñ bolte haiñ

vo bahattar meñ se haiñ jo sar-e-darbār-e-shahāñ

bolte haiñ to sar-e-nok-e-sināñ bolte haiñ

'ishq vāloñ ko faqat husn se nisbat aur bas

'ishq vāloñ ke kahāñ sūd-o-ziyāñ bolte haiñ

ek ik khet kī shādāb gavāhī bar-haq

kab ye ḳhud saada o mā'sūm kisāñ bolte haiñ

tū ne dekhī hai ye ḳhākistar-e-jāñ hī to faqat

raakh hote hue ham sho’la-ba-jāñ bolte haiñ

chāñd taare bhī jo hote haiñ gurezāñ mujh se

kitne jugnū haiñ jo ummīd-rasāñ bolte haiñ

KHud ye faqa-kash-o-nadar kahan bolte hain

dukh to jitne hain ba-andaz-e-fughan bolte hain

gunge jazbe jo mohabbat mein rawan bolte hain

hae kyon tegh-o-tabar tir-o-kaman bolte hain

wo bahattar mein se hain jo sar-e-darbar-e-shahan

bolte hain to sar-e-nok-e-sinan bolte hain

'ishq walon ko faqat husn se nisbat aur bas

'ishq walon ke kahan sud-o-ziyan bolte hain

ek ek khet ki shadab gawahi bar-haq

kab ye KHud sada o ma'sum kisan bolte hain

tu ne dekhi hai ye KHakistar-e-jaan hi to faqat

rakh hote hue hum sho’la-ba-jaan bolte hain

chand tare bhi jo hote hain gurezan mujh se

kitne jugnu hain jo ummid-rasan bolte hain