KHuda jaane kahan se ye kahan tak baat pahunchi hai

ḳhudā jaane kahāñ se ye kahāñ tak baat pahuñchī hai

ki mahfil meñ hamārī dāstāñ tak baat pahuñchī hai

chhiḌā jab zikr gulshan meñ guloñ ke rang-o-nik.hat kā

kisī ke gesū-e-ambar-fishāñ tak baat pahuñchī hai

bahut koshish to kī iḳhfā-e-rāz-e-ishq kī maiñ ne

kisī ke hijr meñ lekin fuġhāñ tak baat pahuñchī hai

maiñ is duniyā meñ vo vāmāñda-e-manzil huuñ ai 'sāqib'

mirī barbādiyoñ kī kārvāñ tak baat pahuñchī hai

KHuda jaane kahan se ye kahan tak baat pahunchi hai

ki mahfil mein hamari dastan tak baat pahunchi hai

chhiDa jab zikr gulshan mein gulon ke rang-o-nikhat ka

kisi ke gesu-e-ambar-fishan tak baat pahunchi hai

bahut koshish to ki iKHfa-e-raaz-e-ishq ki main ne

kisi ke hijr mein lekin fughan tak baat pahunchi hai

main is duniya mein wo wamanda-e-manzil hun ai 'saqib'

meri barbaadiyon ki karwan tak baat pahunchi hai