KHuda ki den se saman-e-zist kya na mila

ḳhudā kī den se sāmān-e-zīst kyā na milā

magar yahī ki mujhe ziist kā maza na milā

navā-e-dil ko koī parda sāzgār nahīñ

chaman meñ nāla-e-bulbul se to gila na milā

sukūn naam hai naql-e-balā ke vaqfe kā

nashāt-e-zīst kā is ke sivā patā na milā

ye haal tā dam-e-āḳhir niyāz-e-shauq rahā

bahut milā jo mujhe nāla-e-rasā na milā

murād dil kī na bar aa.ī is ko kyā kahiye

jahāñ meñ dil hī mujhe hasb-e-mudda.ā na milā

kisī bahāne to jaanā hai ku-e-dil-bar meñ

talāsh-e-dil se ġharaz kyā milā milā na milā

huā yahī ki ham ehsān ḳhud uThā na sake

nahīñ ki qulzum-e-hastī meñ nāḳhudā na milā

ḳhulūs-e-ishq se miltā rahā ġham-e-paiham

hanūz merī vafā kā koī sila na milā

vo ek aur yahāñ āshnā-e-dard hazār

bhalā huā jo dil-e-dard-āshnā na milā

khulā to hai abhī 'shākir' dar-e-ḳhazāna-e-ġhaib

mile kise ki yahāñ qismat-āzmā na milā

KHuda ki den se saman-e-zist kya na mila

magar yahi ki mujhe zist ka maza na mila

nawa-e-dil ko koi parda sazgar nahin

chaman mein nala-e-bulbul se to gila na mila

sukun nam hai naql-e-bala ke waqfe ka

nashat-e-zist ka is ke siwa pata na mila

ye haal ta dam-e-aKHir niyaz-e-shauq raha

bahut mila jo mujhe nala-e-rasa na mila

murad dil ki na bar aai is ko kya kahiye

jahan mein dil hi mujhe hasb-e-muddaa na mila

kisi bahane to jaana hai ku-e-dil-bar mein

talash-e-dil se gharaz kya mila mila na mila

hua yahi ki hum ehsan KHud uTha na sake

nahin ki qulzum-e-hasti mein naKHuda na mila

KHulus-e-ishq se milta raha gham-e-paiham

hanuz meri wafa ka koi sila na mila

wo ek aur yahan aashna-e-dard hazar

bhala hua jo dil-e-dard-ashna na mila

khula to hai abhi 'shakir' dar-e-KHazana-e-ghaib

mile kise ki yahan qismat-azma na mila