KHuda ki qasam jab mulaqat hogi

ḳhudā kī qasam jab mulāqāt hogī

jamāl-e-tabassum kī barsāt hogī

qadam se qadam jab milā kar chaleñge

zamāne kī ham par mudārāt hogī

hasīñ gesuoñ kā jo saaya milegā

na to sub.h hogī na hī raat hogī

zabāñ kā jo pāband hotā nahīñ hai

zamāne meñ kyā us kī auqāt hogī

nasheman pe bijlī girā kar to dekho

na.ī zindagī kī shurū'āt hogī

jahāñ ḳhuun ho jā.egā hasratoñ kā

na Dolī uThegī na bārāt hogī

nadāmat kā ehsās jāgegā jis dam

to dil meñ na koī ḳhurāfāt hogī

kabhī ham se khul kar milā kījiyegā

yahī to mohabbat kī sauġhāt hogī

'adīb' un kī ḳhāmoshiyoñ par na jaao

koī raaz hogā koī baat hogī

KHuda ki qasam jab mulaqat hogi

jamal-e-tabassum ki barsat hogi

qadam se qadam jab mila kar chalenge

zamane ki hum par mudaraat hogi

hasin gesuon ka jo saya milega

na to subh hogi na hi raat hogi

zaban ka jo paband hota nahin hai

zamane mein kya us ki auqat hogi

nasheman pe bijli gira kar to dekho

nai zindagi ki shuru'at hogi

jahan KHun ho jaega hasraton ka

na Doli uThegi na baraat hogi

nadamat ka ehsas jagega jis dam

to dil mein na koi KHurafat hogi

kabhi hum se khul kar mila kijiyega

yahi to mohabbat ki saughat hogi

'adib' un ki KHamoshiyon par na jao

koi raaz hoga koi baat hogi