KHuda ki shan hum phir kucha-e-dildar mein aae

ḳhudā kī shaan ham phir kūcha-e-dildār meñ aa.e

ḳhushā-qismat ki phir ham aaj bazm-e-yār meñ aa.e

kare koī zuleḳhā qadrdānī dekhiye kab tak

vo yūsuf haiñ ki bikne misr ke bāzār meñ aa.e

tabī.at ho chukī hai sair apnī sair-e-gulshan se

junūñ kī ḳhair ho phir vādī-e-pur-ḳhār meñ aa.e

bahut uktā ga.e sahrā kī taptī dhuup se jab ham

to phir āḳhir tumhāre sāya-e-dīvār meñ aa.e

ḳhizāñ ke daur meñ kyā sair-e-gulshan ke liye aate

guloñ par jab bahār aa.ī to ham gulzār meñ aa.e

kise kis ne bulāyā kaun aaya kis liye aaya

munāsib hai na ab ye tazkira aġhyār meñ aa.e

sazā kā mustahiq honā zabāñ-bandī se behtar hai

sadā-e-haq kī ḳhātir justujū-e-dār meñ aa.e

tumhīñ ko dekhne vaale the ham āḳhir kahāñ jaate

tumhāre dar pe āḳhir hasrat-e-dīdār meñ aa.e

bayān imkān se bāhar hai jazbāt-e-aqīdat kā

guzartī hai jo dil par kis tarah ash.ār meñ aa.e

itā.at quvvat-e-bātil kī ho jaa.e na ai 'tal.at'

kisī sūrat na ḳham hargiz sar-e-ḳhuddār meñ aa.e

KHuda ki shan hum phir kucha-e-dildar mein aae

KHusha-qismat ki phir hum aaj bazm-e-yar mein aae

kare koi zuleKHa qadrdani dekhiye kab tak

wo yusuf hain ki bikne misr ke bazar mein aae

tabiat ho chuki hai sair apni sair-e-gulshan se

junun ki KHair ho phir wadi-e-pur-KHar mein aae

bahut ukta gae sahra ki tapti dhup se jab hum

to phir aaKHir tumhaare saya-e-diwar mein aae

KHizan ke daur mein kya sair-e-gulshan ke liye aate

gulon par jab bahaar aai to hum gulzar mein aae

kise kis ne bulaya kaun aaya kis liye aaya

munasib hai na ab ye tazkira aghyar mein aae

saza ka mustahiq hona zaban-bandi se behtar hai

sada-e-haq ki KHatir justuju-e-dar mein aae

tumhin ko dekhne wale the hum aaKHir kahan jate

tumhaare dar pe aaKHir hasrat-e-didar mein aae

bayan imkan se bahar hai jazbaat-e-aqidat ka

guzarti hai jo dil par kis tarah ashaar mein aae

itaat quwwat-e-baatil ki ho jae na ai 'talat'

kisi surat na KHam hargiz sar-e-KHuddar mein aae