KHuda ki shan wo KHud ho rahe hain diwane

ḳhudā kī shaan vo ḳhud ho rahe haiñ dīvāne

jo rāh-e-dasht se aa.e the ham ko palTāne

nikal chale to haiñ tarġhīb-e-dil pe ham ghar se

kahāñ lageñge Thikāne ye ab ḳhudā jaane

na dil rahā na rahī dil kī ḳhaak bhī baaqī

huzūr aa.e haiñ ab intizār farmāne

jo dil kī aag se vāqif baneñ vo kyā jaane

lipaT ke sham.a se kyuuñ jal rahe haiñ parvāne

nigāh jin ko milī hai vo lutf lete haiñ

chhalak rahe haiñ paḌe kaifiyat se vīrāne

nahīñ hai siine meñ paivast jis ke tīr-e-nigāh

vo rāh-o-rasm hayāt-o-mamāt kyā jaane

chale to haiñ ki dikhā.eñge un ko chiir ke dil

pahuñch sakeñge ham un tak ye ab ḳhudā jaane

ghaTe to chain nahīñ hai baḌhe to chain nahīñ

hameñ lagā hai ye kyā rog koī pahchāne

hai sar pe bojh to kyā hai magar baḌhe niklo

na uTh sakoge jo baiThe zarā bhī sustāne

tamām umr huī ek hī ravish pe 'jigar'

hazār baar hameñ āzmāyā duniyā ne

KHuda ki shan wo KHud ho rahe hain diwane

jo rah-e-dasht se aae the hum ko palTane

nikal chale to hain targhib-e-dil pe hum ghar se

kahan lagenge Thikane ye ab KHuda jaane

na dil raha na rahi dil ki KHak bhi baqi

huzur aae hain ab intizar farmane

jo dil ki aag se waqif banen wo kya jaane

lipaT ke shama se kyun jal rahe hain parwane

nigah jin ko mili hai wo lutf lete hain

chhalak rahe hain paDe kaifiyat se virane

nahin hai sine mein paiwast jis ke tir-e-nigah

wo rah-o-rasm hayat-o-mamat kya jaane

chale to hain ki dikhaenge un ko chir ke dil

pahunch sakenge hum un tak ye ab KHuda jaane

ghaTe to chain nahin hai baDhe to chain nahin

hamein laga hai ye kya rog koi pahchane

hai sar pe bojh to kya hai magar baDhe niklo

na uTh sakoge jo baiThe zara bhi sustane

tamam umr hui ek hi rawish pe 'jigar'

hazar bar hamein aazmaya duniya ne