KHuda ki zat ko hairat ke zawiye se dekh

ḳhudā kī zaat ko hairat ke zāviye se dekh

nazar bhī aa.egā manzar ko hausle se dekh

yaqīñ ke ḳhauf ne kitnoñ ko rok rakkhā hai

ye e'tibār zarūrat ke falsafe se dekh

tire ḳhilāf muravvat meñ kuchh nahīñ bolā

tū aa.ine ko zarā aur vasvase se dekh

ghumā-phirā ke bhī sīdhī sī baat kyā karnā

maiñ sāmne kī haqīqat huuñ sāmne se dekh

zamīn ghūmtī hai so kahīñ nahīñ jaatī

ye dā.ere ke masā.il haiñ dā.ere se dekh

maiñ inhimāk se gajroñ ke band bāñdhtā huuñ

tū muskurā ke mohabbat se aa.ine se dekh

KHuda ki zat ko hairat ke zawiye se dekh

nazar bhi aaega manzar ko hausle se dekh

yaqin ke KHauf ne kitnon ko rok rakkha hai

ye e'tibar zarurat ke falsafe se dekh

tere KHilaf murawwat mein kuchh nahin bola

tu aaine ko zara aur waswase se dekh

ghuma-phira ke bhi sidhi si baat kya karna

main samne ki haqiqat hun samne se dekh

zamin ghumti hai so kahin nahin jati

ye daere ke masail hain daere se dekh

main inhimak se gajron ke band bandhta hun

tu muskura ke mohabbat se aaine se dekh