KHuda ne jab mujh bashar ko apna KHalaf banaya sawal ye hai

ḳhudā ne jab mujh bashar ko apnā ḳhalaf banāyā savāl ye hai

to maiñ ne kyoñ āsmān sar par nahīñ uThāyā savāl ye hai

hudūd toḌe baġhair duniyā meñ koī naġhma amar nahīñ hai

mire muġhannī ne āTHvāñ sur kahāñ lagāyā savāl ye hai

kaTe phaTe ham to yūñhī zāġh-o-zaġhan ke dar par paḌe hue haiñ

hamāre lāshoñ ko panditoñ ne nahīñ jalāyā savāl ye hai

varā-e-insāñ kahīñ to zulmat kā koī gaTh-joḌ hai ḳhudā se

qarīb rahtā hai is qadar raushnī ke saaya savāl ye hai

kahāñ hai vo saltanat vo duniyā jahāñ pe terī hukūmateñ haiñ

kahīñ to hogī tirī ḳhudā.ī mire ḳhudāyā savāl ye hai

savāl ye to nahīñ jo tū ne kahā ki ab ham nahīñ mileñge

savāl ye hai ki kyoñ tujhe ye ḳhayāl aaya savāl ye hai

jo ātish-e-ruḳh se gulsitāñ ko gulāb ho kar jalā rahā hai

hazār hairat hai tū ne ye kaisā gul khilāyā savāl ye hai

KHuda ne jab mujh bashar ko apna KHalaf banaya sawal ye hai

to main ne kyon aasman sar par nahin uThaya sawal ye hai

hudud toDe baghair duniya mein koi naghma amar nahin hai

mere mughanni ne aaTHwan sur kahan lagaya sawal ye hai

kaTe phaTe hum to yunhi zagh-o-zaghan ke dar par paDe hue hain

hamare lashon ko panditon ne nahin jalaya sawal ye hai

wara-e-insan kahin to zulmat ka koi gaTh-joD hai KHuda se

qarib rahta hai is qadar raushni ke saya sawal ye hai

kahan hai wo saltanat wo duniya jahan pe teri hukumaten hain

kahin to hogi teri KHudai mere KHudaya sawal ye hai

sawal ye to nahin jo tu ne kaha ki ab hum nahin milenge

sawal ye hai ki kyon tujhe ye KHayal aaya sawal ye hai

jo aatish-e-ruKH se gulsitan ko gulab ho kar jala raha hai

hazar hairat hai tu ne ye kaisa gul khilaya sawal ye hai