KHuda se aashnai chahta hun

ḳhudā se āshnā.ī chāhtā huuñ

magar kuchh rahnumā.ī chāhtā huuñ

koī andāz ho lekin achhūtā

vo nāz-e-dil-rubā.ī chāhtā huuñ

bahut nādim huuñ apnī hasratoñ par

are tauba ḳhudā.ī chāhtā huuñ

ijāzat ho to dil kā haal kah luuñ

ki maiñ bhī lab-kushā.ī chāhtā huuñ

matā-e-dard-e-dil ko kam milī hai

tavajjoh intihā.ī chāhtā huuñ

samajh to luuñ hayāt-e-ishq kyā hai

zarā sī kaj-adā.ī chāhtā huuñ

chaman-ārā.iyāñ un ko mubārak

faroġh-e-ḳhud-numā.ī chāhtā huuñ

tirī mahfil tak aayā to huuñ lekin

tire dil tak rasā.ī chāhtā huuñ

nasheman meñ bhī dil uktā rahā thā

qafas se bhī rihā.ī chāhtā huuñ

ta.allī hai jo sharh-e-zabt-e-ġham meñ

sazā-e-ḳhud-satā.ī chāhtā huuñ

sunā hai husn abhī hai nā-mukammal

ġhazal kī rahnumā.ī chāhtā huuñ

ba-juz us ke koī hasrat nahīñ hai

maiñ us dar kī gadā.ī chāhtā huuñ

chalūñ us dar pe 'nudrat' chal ke dekhūñ

jo qismat-āzmā.ī chāhtā huuñ

KHuda se aashnai chahta hun

magar kuchh rahnumai chahta hun

koi andaz ho lekin achhuta

wo naz-e-dil-rubai chahta hun

bahut nadim hun apni hasraton par

are tauba KHudai chahta hun

ijazat ho to dil ka haal kah lun

ki main bhi lab-kushai chahta hun

mata-e-dard-e-dil ko kam mili hai

tawajjoh intihai chahta hun

samajh to lun hayat-e-ishq kya hai

zara si kaj-adai chahta hun

chaman-araiyan un ko mubarak

farogh-e-KHud-numai chahta hun

teri mahfil tak aaya to hun lekin

tere dil tak rasai chahta hun

nasheman mein bhi dil ukta raha tha

qafas se bhi rihai chahta hun

talli hai jo sharh-e-zabt-e-gham mein

saza-e-KHud-satai chahta hun

suna hai husn abhi hai na-mukammal

ghazal ki rahnumai chahta hun

ba-juz us ke koi hasrat nahin hai

main us dar ki gadai chahta hun

chalun us dar pe 'nudrat' chal ke dekhun

jo qismat-azmai chahta hun