KHuda shahid suluk-e-narawa se choT lagti hai

ḳhudā shāhid sulūk-e-nāravā se choT lagtī hai

na muñh phero ki dil par is adā se choT lagtī hai

qasam tum ko yūñhī bātoñ ke patthar mārte rahnā

mire shīsha-sifat dil par balā se choT lagtī hai

mire mohsin mirī ġhayyūr fitrat ko na pahchāne

ki har baḌhte hue dast-e-atā se choT lagtī hai

kuchh aise haiñ bikhar jaate haiñ jo phūloñ kī ḳhushbū se

kuchh aise haiñ jinheñ bād-e-sabā se choT lagtī hai

yaqīnan phir unheñ me.aar jiine kā nahīñ aatā

jinheñ merī ḳhudī merī anā se choT lagtī hai

azīzo zindagī kī talḳhiyoñ se maiñ to baaz aaya

rafīqo aur jiine kī duā se choT lagtī hai

bajā.e dil koī patthar rakhā hai jin ke siine meñ

unheñ kyoñ 'shād' kī āh-o-bukā se choT lagtī hai

KHuda shahid suluk-e-narawa se choT lagti hai

na munh phero ki dil par is ada se choT lagti hai

qasam tum ko yunhi baaton ke patthar marte rahna

mere shisha-sifat dil par bala se choT lagti hai

mere mohsin meri ghayyur fitrat ko na pahchane

ki har baDhte hue dast-e-ata se choT lagti hai

kuchh aise hain bikhar jate hain jo phulon ki KHushbu se

kuchh aise hain jinhen baad-e-saba se choT lagti hai

yaqinan phir unhen mear jine ka nahin aata

jinhen meri KHudi meri ana se choT lagti hai

azizo zindagi ki talKHiyon se main to baz aaya

rafiqo aur jine ki dua se choT lagti hai

bajae dil koi patthar rakha hai jin ke sine mein

unhen kyon 'shad' ki aah-o-buka se choT lagti hai