KHudi ke josh mein fikr-e-maal-e-kar nahin

ḳhudī ke josh meñ fikr-e-ma.āl-e-kār nahīñ

jise hai hosh kā da.avā vo hoshiyār nahīñ

ḳhushī ke naam se uThtī hai huuk sī dil meñ

ḳhayāl-e-aish bhī ab ham ko sāzgār nahīñ

ab aise banda ko muḳhtār samjheñ yā majbūr

jise amal tak irāde se iḳhtiyār nahīñ

bahār aatī hai guzregī ai junūñ kyūñkar

abhī se jaib-o-garebāñ meñ ek taar nahīñ

har ek zarra-e-hastī hai iztirāb-farosh

ġharaz kisī ko tire ahd meñ qarār nahīñ

karīm terī karīmī kī shaan ke sadqe

gunāh kar ke bhī mujrim gunāhgār nahīñ

adam ko jaatā hai hastī kā kārvāñ ḳhāmosh

sadā jaras kī nahīñ ġhul nahīñ pukār nahīñ

sarishk-e-ḳhūñ se qafas lāla-zār hai 'farruḳh'

ye vo chaman hai jo minnat-kash-e-bahār nahīñ

KHudi ke josh mein fikr-e-maal-e-kar nahin

jise hai hosh ka dawa wo hoshiyar nahin

KHushi ke nam se uThti hai huk si dil mein

KHayal-e-aish bhi ab hum ko sazgar nahin

ab aise banda ko muKHtar samjhen ya majbur

jise amal tak irade se iKHtiyar nahin

bahaar aati hai guzregi ai junun kyunkar

abhi se jaib-o-gareban mein ek tar nahin

har ek zarra-e-hasti hai iztirab-farosh

gharaz kisi ko tere ahd mein qarar nahin

karim teri karimi ki shan ke sadqe

gunah kar ke bhi mujrim gunahgar nahin

adam ko jata hai hasti ka karwan KHamosh

sada jaras ki nahin ghul nahin pukar nahin

sarishk-e-KHun se qafas lala-zar hai 'farruKH'

ye wo chaman hai jo minnat-kash-e-bahaar nahin