KHudi ko aazmana chahta hun

ḳhudī ko āzmānā chāhtā huuñ

tujhe bhī bhuul jaanā chāhtā huuñ

tire logoñ meñ rishte mar rahe haiñ

zamīñ ko ye batānā chāhtā huuñ

bahut ro.e haiñ ye shabnam se mil kar

guloñ ko maiñ hañsānā chāhtā huuñ

binā tere mahak kis tarah phailī

havā ko ye dikhānā chāhtā huuñ

jo pas-manzar meñ rahte haiñ hamesha

unheñ manzar meñ laanā chāhtā huuñ

nazar uktā ga.ī hai manzaroñ se

na.ī duniyā basānā chāhtā huuñ

faqīrāna chaTā.ī ko bichhā kar

sar-e-shāhī jhukānā chāhtā huuñ

ab apne hijr kī rūdād 'nāshir'

sitāroñ ko sunānā chāhtā huuñ

KHudi ko aazmana chahta hun

tujhe bhi bhul jaana chahta hun

tere logon mein rishte mar rahe hain

zamin ko ye batana chahta hun

bahut roe hain ye shabnam se mil kar

gulon ko main hansana chahta hun

bina tere mahak kis tarah phaili

hawa ko ye dikhana chahta hun

jo pas-manzar mein rahte hain hamesha

unhen manzar mein lana chahta hun

nazar ukta gai hai manzaron se

nai duniya basana chahta hun

faqirana chaTai ko bichha kar

sar-e-shahi jhukana chahta hun

ab apne hijr ki rudad 'nashir'

sitaron ko sunana chahta hun