khul gai hai aql jhaT se dil magar Dar kar khula

khul ga.ī hai 'aql jhaT se dil magar Dar kar khulā

ik jhijhaktā hī rahā aur ek thā phar-phar khulā

ham the jannat ke liye par aa ga.e haiñ dahr meñ

thā zamīñ kā raaz lekin āsmānoñ par khulā

sub.h kā bhūlā kisī shab lauT aa.egā zarūr

bas isī ummīd par hī rakh diyā hai dar khulā

raat un ko ḳhvāb meñ dekhā hai kuchh is haal meñ

paañv nange saañs phūlī ashk jaarī sar khulā

khaTkhaTātā phir rahā thā is nagar se us nagar

aur darvāza khulā bhī to mire andar khulā

jaan mobile meñ aa.ī charger ko dekh kar

log chīḳhe daad aa.ī tab kahīñ shā'ir khulā

yūñhī thoḌī ho ga.e chālāk 'sūfī' boliye

choT khaa.ī dhoke khaa.e tab hamārā sar khulā

khul gai hai 'aql jhaT se dil magar Dar kar khula

ek jhijhakta hi raha aur ek tha phar-phar khula

hum the jannat ke liye par aa gae hain dahr mein

tha zamin ka raaz lekin aasmanon par khula

subh ka bhula kisi shab lauT aaega zarur

bas isi ummid par hi rakh diya hai dar khula

raat un ko KHwab mein dekha hai kuchh is haal mein

panw nange sans phuli ashk jari sar khula

khaTkhaTata phir raha tha is nagar se us nagar

aur darwaza khula bhi to mere andar khula

jaan mobile mein aai charger ko dekh kar

log chiKHe dad aai tab kahin sha'ir khula

yunhi thoDi ho gae chaalak 'sufi' boliye

choT khai dhoke khae tab hamara sar khula