khul gaya raaz ayan ho gai ayyari-e-shab

khul gayā raaz ayaañ ho ga.ī ayyārī-e-shab

kitnī saffāk hai bātin meñ ziyā-bārī-e-shab

mohlat-e-ishq ko darkār hai marzī us kī

dil ke saude meñ sivā hogī ḳharīdārī-e-shab

kahīñ aañsū kahīñ aaheñ kahīñ pāmāl fazā

jis taraf dekho nazar aa.e siyāhkārī-e-shab

niiñd kā kyā hai vo suulī pe bhī aa jaa.e magar

durr-e-nāyāb huī jaatī hai bedārī-e-shab

roz kahtī hai ḳhirad din kī rifāqat meñ rahūñ

dil magar roz hī kartā hai taraf-dārī-e-shab

ik vahī ḳhvāb jo palkoñ se judā ho na sakā

umr bhar naaz se kartā rahā dildārī-e-shab

ḳhema-e-chashm jalā ḳhvāb kā asbāb jalā

ashk se ho ga.ī takmīl-e-sharar-bārī-e-shab

roz-e-raushan kī tarah maiñ bhī safar kartā 'shakīl'

gar mirī raah meñ hotī na amal-dārī-e-shab

khul gaya raaz ayan ho gai ayyari-e-shab

kitni saffak hai baatin mein ziya-bari-e-shab

mohlat-e-ishq ko darkar hai marzi us ki

dil ke saude mein siwa hogi KHaridari-e-shab

kahin aansu kahin aahen kahin pamal faza

jis taraf dekho nazar aae siyahkari-e-shab

nind ka kya hai wo suli pe bhi aa jae magar

durr-e-nayab hui jati hai bedari-e-shab

roz kahti hai KHirad din ki rifaqat mein rahun

dil magar roz hi karta hai taraf-dari-e-shab

ek wahi KHwab jo palkon se juda ho na saka

umr bhar naz se karta raha dildari-e-shab

KHema-e-chashm jala KHwab ka asbab jala

ashk se ho gai takmil-e-sharar-bari-e-shab

roz-e-raushan ki tarah main bhi safar karta 'shakil'

gar meri rah mein hoti na amal-dari-e-shab