khula mujh par dar-e-imkan rakhna

khulā mujh par dar-e-imkān rakhnā

mire maulā mujhe hairān rakhnā

yahī ik marhala manzil na Thahre

yahī ik marhala āsān rakhnā

mire dil kā varaq nikle na saada

koī ḳhvāhish koī armān rakhnā

ye dil tāq-e-charāġh-e-zar na Thahre

mire mālik mujhe nādān rakhnā

mire hālāt mujh ko chhū na paa.eñ

mujhe har haal meñ insān rakhnā

bharī rakhnā mire maulā ye āñkheñ

dukhoñ kī bārishoñ kā maan rakhnā

mire sāthī bhī mujh se be-navā haiñ

bisāteñ dekh kar tāvān rakhnā

ye din kyūñkar chaḌhā vo shab Dhalī kyuuñ

mujhe aayā na itnā dhyān rakhnā

mujhe bhī 'aam yā gumnām kar de

ki ik āzār hai pahchān rakhnā

asīr-e-umr ko aayā na ab tak

kitāb-e-hijr kā 'unvān rakhnā

havā kī tarah sahrā se guzar jā

safar meñ kyā sar-o-sāmān rakhnā

khula mujh par dar-e-imkan rakhna

mere maula mujhe hairan rakhna

yahi ek marhala manzil na Thahre

yahi ek marhala aasan rakhna

mere dil ka waraq nikle na sada

koi KHwahish koi arman rakhna

ye dil taq-e-charagh-e-zar na Thahre

mere malik mujhe nadan rakhna

mere haalat mujh ko chhu na paen

mujhe har haal mein insan rakhna

bhari rakhna mere maula ye aankhen

dukhon ki barishon ka man rakhna

mere sathi bhi mujh se be-nawa hain

bisaten dekh kar tawan rakhna

ye din kyunkar chaDha wo shab Dhali kyun

mujhe aaya na itna dhyan rakhna

mujhe bhi 'am ya gumnam kar de

ki ek aazar hai pahchan rakhna

asir-e-umr ko aaya na ab tak

kitab-e-hijr ka 'unwan rakhna

hawa ki tarah sahra se guzar ja

safar mein kya sar-o-saman rakhna