khule jo dil ke hain wo baat saf karte hain

khule jo dil ke haiñ vo baat saaf karte haiñ

haqīqatoñ kā vahī e'tirāf karte haiñ

zarā sī baat pe ahbāb hote haiñ barham

kabhī ḳhatā.eñ bhī dushman muaaf karte haiñ

vo ittihād kī karte haiñ baat kis muñh se

jo paidā qaum meñ ḳhud iḳhtilāf karte haiñ

jinheñ hai aaj bhī da.avā chaman-parastī kā

vo sāzisheñ bhī chaman ke ḳhilāf karte haiñ

baḌā subūt hai un kī buland-zarfī kā

ḳhatā jo karke agar e'tirāf karte haiñ

junūñ meñ farz nahīñ bhūle tere dīvāne

harīm-e-nāz kā terī tavāf karte haiñ

'nazar' anā kā nasha is qadar hai logoñ meñ

ki harf-e-haq se bhī vo inhirāf karte haiñ

khule jo dil ke hain wo baat saf karte hain

haqiqaton ka wahi e'tiraf karte hain

zara si baat pe ahbab hote hain barham

kabhi KHataen bhi dushman muaf karte hain

wo ittihad ki karte hain baat kis munh se

jo paida qaum mein KHud iKHtilaf karte hain

jinhen hai aaj bhi dawa chaman-parasti ka

wo sazishen bhi chaman ke KHilaf karte hain

baDa subut hai un ki buland-zarfi ka

KHata jo karke agar e'tiraf karte hain

junun mein farz nahin bhule tere diwane

harim-e-naz ka teri tawaf karte hain

'nazar' ana ka nasha is qadar hai logon mein

ki harf-e-haq se bhi wo inhiraf karte hain