khuli aankhon ko rah di maine

khulī āñkhoñ ko raah dī maiñ ne

jab bhī taaza ġhazal kahī maiñ ne

dāstānoñ se qatl-gāhoñ tak

surḳh hoñToñ kī sharh kī maiñ ne

najd kī vādiyoñ se guzrā huuñ

dekhī hai qais kī galī maiñ ne

maiñ bhī shāmil huuñ us kī dhaḌkan meñ

apnī āvāz ḳhud sunī maiñ ne

vo jo aayā mire ḳhayāloñ meñ

baḌh ke peshānī chuum lī maiñ ne

kis ko samjhā.ūñ kaun samjhegā

aur tafhīm chhoḌ dī maiñ ne

us zamāne ke 'mīr' sāhib the

is zamāne meñ baat kī maiñ ne

dariyā kuuze meñ band karnā thā

baat ġhazloñ kī chheḌ dī maiñ ne

khuli aankhon ko rah di main ne

jab bhi taza ghazal kahi main ne

dastanon se qatl-gahon tak

surKH honTon ki sharh ki main ne

najd ki wadiyon se guzra hun

dekhi hai qais ki gali main ne

main bhi shamil hun us ki dhaDkan mein

apni aawaz KHud suni main ne

wo jo aaya mere KHayalon mein

baDh ke peshani chum li main ne

kis ko samjhaun kaun samjhega

aur tafhim chhoD di main ne

us zamane ke 'mir' sahib the

is zamane mein baat ki main ne

dariya kuze mein band karna tha

baat ghazlon ki chheD di main ne