khuli faza ka ubharta nahin saman ghar mein

khulī fazā kā ubhartā nahīñ samāñ ghar meñ

nahīñ banāte parinde ab āshiyāñ ghar meñ

jo chal rahī thiiñ to dahkā kiye dar-o-dīvār

rukīñ havā.eñ to bharne lagā dhuāñ ghar meñ

saje haiñ farsh lahū se to dar azāboñ se

ugī haiñ saḳht zamīnoñ kī khetiyāñ ghar meñ

sukūñ kī shakl ho paidā koī to kaise ho

yaqīñ hai sarhad-e-jāñ se pare gumāñ ghar meñ

ajiib taur se badle haiñ mausamoñ ne chalan

bahār dasht meñ rahtī hai aur ḳhizāñ ghar meñ

ulaT ga.e haiñ qarābat ke zābte saare

sabā.eñ qabr pe chaltī haiñ āñdhiyāñ ghar meñ

use hī maan liyā ham ne baḳht kā maavā

bajā rahā thā jo aaseb sīTiyāñ ghar meñ

nahīñ vo aañkh ki ham dushmanoñ ko pahchāneñ

dabā.e baiThe haiñ apnoñ kī haDDiyāñ ghar meñ

ibādatoñ ne bhī DhūñDe haiñ ab na.e maskan

namāz hone lagī dasht meñ azaañ ghar meñ

uThā ke sar kabhī nikle to ye na yaad rahā

ki chhoḌ aa.e haiñ aabā kī pagḌiyāñ ghar meñ

milā hai baaz adālat kā dar pe kyā kiije

paḌī hai ḳhauf se sahmī huī zabāñ ghar meñ

subūt-e-be-gahnī rah gayā ḳhayāloñ meñ

rakhā safā.ī kā yāroñ ne har bayāñ ghar meñ

hai 'arsh' aaj to fitrat bhī ham-rakāb-e-qazā

ghaTā.eñ auj-e-falak par haiñ bijliyāñ ghar meñ

khuli faza ka ubharta nahin saman ghar mein

nahin banate parinde ab aashiyan ghar mein

jo chal rahi thin to dahka kiye dar-o-diwar

rukin hawaen to bharne laga dhuan ghar mein

saje hain farsh lahu se to dar azabon se

ugi hain saKHt zaminon ki khetiyan ghar mein

sukun ki shakl ho paida koi to kaise ho

yaqin hai sarhad-e-jaan se pare guman ghar mein

ajib taur se badle hain mausamon ne chalan

bahaar dasht mein rahti hai aur KHizan ghar mein

ulaT gae hain qarabat ke zabte sare

sabaen qabr pe chalti hain aandhiyan ghar mein

use hi man liya hum ne baKHt ka mawa

baja raha tha jo aaseb siTiyan ghar mein

nahin wo aankh ki hum dushmanon ko pahchanen

dabae baiThe hain apnon ki haDDiyan ghar mein

ibaadaton ne bhi DhunDe hain ab nae maskan

namaz hone lagi dasht mein azan ghar mein

uTha ke sar kabhi nikle to ye na yaad raha

ki chhoD aae hain aaba ki pagDiyan ghar mein

mila hai baz adalat ka dar pe kya kije

paDi hai KHauf se sahmi hui zaban ghar mein

subut-e-be-gahni rah gaya KHayalon mein

rakha safai ka yaron ne har bayan ghar mein

hai 'arsh' aaj to fitrat bhi ham-rakab-e-qaza

ghaTaen auj-e-falak par hain bijliyan ghar mein